Дел од улиците во централното градско подрачје повеќе од еден месец се во мрак. Уличното осветлување не работи на дел од булеварите Благоја Тоска и Маршал Тито, како и на улицата Јане Сандански. Јавно осветлување нема доволно и во повеќе тетовски населби.

„Мора да се штеди, можеби затоа и нема во одредени делови од улиците улично осветлување. Но, треба тоа да биде порегулирано. На пример две сијалици да светат, две не, оти вака во должина од над 100 метри да нема осветлување е многу ризично. Мракот е ризичен, оти има кучиња скитници навечер, а во темница е уште пострашно, не можеш да се одбраниш, вели една жителка на Тетово.

Претседателот на советот на Општина Тетово Бесар Дурмиши, на денешната седница на советот на Општина Тетово, каде беше формирано Трговско друштво „Електро Тетово“ вели дека во иднина нема да се јавуваат вакви проблеми, оти со осветлувањето ќе менаџира новоформираното претпријатие, кое ќе набавува струја по поефтина цена, но и ќе произведува струја преку систем на соларни панели. На тој начин ќе заштедат и граѓаните и општината.

„Ние минатата седница донесовме одлука за формирање на „Јавно претпријатие Електро Тетово“, но немавме можност да го регистрираме како „Јавно претпријатие“, така ние рекоа во Централен регистар и моравме да го регистрираме како „Трговско друштво“. Со новото претпријатие нема да се појавуваат проблеми како до сега. Но, сепак претпријатието за да заштеди, дополнително ќе воведе и рестрикции, односно во одреден дел од ноќта на некои места ќе се гасат уличните светилки, но тоа ќе биде добро испланирано, за да не биде градот во тотален мрак, рече Бесар Дурмиши, претседател на Советот на Општина Тетово.

За одлуката за формирање на Трговското друштво „Електро Тетово“ гласаа 16 советници, но 14 беа против. Опозицијата не дигна рака, оти како што рекоа , пред да се изгласа точката, не добиле никакви информации околу претпријатието, како ќе се менаџира, колку вработени ќе има и кој е бенефитот од неговото функционирање.

„Ние кога влеговме како советничка група на СДСМ во советот рековме дека сите проекти ќе ги подржиме, но овој пат за овој предлот не гласавме, оти немаме никаков податок, каква структура ќе има претпријатието, од каде ќе набавува струја и дали и каков бенефит ќе имаат граѓаните“, истакна Глиигорие Стојановски советник од советничката група на СДСМ

Инаку Општина Тетово формираше претпријатие, во време кого долгот на градската власт за улично осветлување изнесува 37 милиони денари.