Општина Неготино ги откажа сите забавно-музички настани во градот, во пресрет на „Св. Трифун“, од почит кон двајцата сограѓани – Фросина Кулакова, која беше прегазена на булеварот „Партизански Одреди“ во Скопје и Миле Тодоров, по кој се трага со денови.

Осум дена се трага по Миле Тодоров од Неготино

– Имајќи ја предвид сензитивноста на моментот во кој се одвива секојдневието на Неготино и неговите граѓани и пошироко во Македонија, Општина Неготино како организатор на манифестацијата, ја информира јавноста дека се откажани сите предвидени забавно-музички активности во рамките на манифестацијата, со која се одбележува празникот на лозарите и винарите, „Свети Трифун“ – изјавија од Службата за информирање за МИА.

Според програма што ќе се одвива од среда до петок, кога на градскиот плоштад се одржува централниот настан, ќе се одржи натпревар во дегустација на вина и ракии на индивидуални производители, традиционалната изложба на Здружението на граѓани „Стари занаети“, доделување награди на најдобрите производители на вина и ракии, доделување награди по распишаниот ликовен и литературен конкурс во трите училишта од градот и базар на ракотворби што ќе биде од хуманитарен карактер, а собраните средства ќе бидат наменети за подигнување на сообраќајната свест на учесниците во сообраќајот.

Во сабота, на 8 февруари е најавен протест во Неготино, насловен „Стоп за сообраќајното насилство“. Протестот ќе се одржи во 14 часот, на улица Маршал Тито, кај семафорите. Другарките на Фросина организираат бесплатен автобус од Скопје до Неготино и назад, за сите кои сакаат да присуствуваат на протестниот марш.

Во сабота во Неготино протестен марш за правда за Фросина Кулакова