Општина Кисела Вода за училиштето за слепи лица „Димитар Влахов“ обезбеди нови книги напишани со Брајова азбука, кои децата ќе ги добијат веднаш по враќањето од распуст.

Ова го правиме веќе трета година по ред и со задоволство можам да кажам дека библиотеката ја опремивме со 60-ина вакви наслови. Книгите напишани со Брајово писмо се изработуваат на посебна хартија, со специјални печатачи, што ги прави исклучително скапи и тешко достапни за родителите на слепите ученици. Достапноста на литература за нив значи подобар образовен пат и остварување на правото за еднакви можности со сите други граѓани. Годинава се одлучивме да им ги донираме повеќетомните изданија „Алиса во земјата на чудата“ и „Петар Пан“, светски популарни книги, со што им овозможуваме исто литературно доживување како и со другите што не се соочени со предизвиците од оштетен вид – рече градоначалникот Орце Ѓорѓиевски.

Тој најавува дека ќе продолжи и понатаму да се инвестира во основните потреби за лицата со оштетен вид и други попречености преку обезбедување услови за нивно активно вклучување во сите сфери на општеството и подигнување на свесноста кај сите институции за поддршката на различноста и инклузивноста.