Дел од урбаната опрема на територија на Општина Аеродром во изминатиот период постојано се уништува несовесни граѓани. За таа цел, од Општината излегоа со реакција околу ваквото неодговорно однесување на поединци, кои покрај тоа што предизвикуваат материјална штета, истовремено го нарушуваат и изгледот на уредените простори.

– До нашите служби стигнаа видеа и фотографии на кои е евидентирано несовесно однесување, односно во езерцето што се наоѓа во паркот во населбата Лисиче се забележани риби, а фонтаната во паркот „Бојмија“ во населбата Острово е оштетена со боја. Редовно се уништуваат и се кршат и чешмичките за пиење вода, кои целосно ги саниравме во изминатите денови, но тоа, за жал, не престанува тука. Нивното оштетување значи непотребен дополнителен трошок, но што е најважно, тие не се функционални во пролетниот и летниот период, токму кога им се најпотребни на жителите – децидни се од Општина Аеродром.

Од локалната самоуправа меѓу другото објаснуваат и дека вработените во Општината речиси секојдневно во топлите денови мора да се справуваат со група граѓани што се бањаат во големите фонтани низ парковите во Аеродром, што од една страна претставува лоша слика, но истовремено е и крајно опасно по нивните животи.

– Општината го осудува ваквото вандалско и крајно несовесно однесување и во идниот период ќе воведеме редовни чуварски служби, кои ќе се грижат за безбедноста на општинскиот имот и јавните површини. Истовремено апелираме до граѓаните да се грижат и да го чуваат секое катче од нашиот Аеродром, затоа што само така можеме да имаме уредена, зелена и здрава средина – информираат од Општината.