Во паркот во Ново Лисиче се случува вистинска „зелена приказна“. Парцели со засадени билки, чери домати, грав, сончоглед, магдонос… И многу волја од луѓето, кои се грижат за расадите и со љубов ги растат овие култури. Од каде сево ова? Да почнеме од почетокот.

Општествената градина наречена „Бостание“ (одлично име, патем), е концепт на заедничко градинарство, кое во светот е веќе практика и е дел од големата еко – слика за сезонско вложување и одгледување градинарски култури.

Позади оваа акција стои здружението „Зелената арка“ основано во 2007 година, во Скопје, кое согласно принципите и философијата на Пермакултурата, активно делува во примената на обновливниот развој и заштитата на животната средина.

Градината е финансирана од Град Скопје, а во неа копаат, плеват, собираат и уживаат голем број вљубеници на природата и градинарството. Убавината на оваа идеја е што може секој, кој сака да учествува, да се пријави на формуларот овде и да биде дел од приказната. Ова здружение ги поддржува сите иницијативи што се грижат за мирот, толеранцијата и соработката помеѓу луѓето.

Дел од „Бостание“ е и Васко Марковски, Скопјанец, поет, туристички водич и љубител на градинарењето. За процесот на создавање ваква симбиоза помеѓу градот, човекот и природата, одамна сонувал. Во една прилика, на новинарското прашање кога би можел да биде градоначалник на Скопје, што би направил, тој одговара – Градина близу до дома. И би! Васко веќе одредено време е дел од тајфата на Бостание и се води од премисата на отец Мајкл Гилис, блогер и подкастер кој вели:

„Без разлика дали ќе го одберете тоа или не, мора да се справите со градината, тоа што го наводнувате, ќе порасне. Плевелот што го игнорирате, ќе завладее. Во животот, исто како и во градината, тешко е да одгледате добри плодови. Најлесно е да се одгледа плевел. Растенијата што сакаме да дадат плод, бараат внимание – затоа и ние мора да посветиме внимание на нашиот живот, она што сееме, наводнуваме, охрабруваме… Мораме да сме тука, присутни“

За целите на ова граѓанско градинарство и она што ќе се случува на 25 август, поразговаравме со Димитар Самарџиев, дел од екипажот на Зелената арка, инаку и самиот ентузијаст и градинар.

Да се има градина, значи да се верува во утрешнината. Што значи ова за луѓето, кои во градот добија простор за „верба“ во утрешнината преку градинарењето?

Димитар: Претпоставувам дека одговорите на ова прашање може да се добијат поединечно од сите, кои градинарат во општествената градина Бостание и верувам дека сите одговори би биле различни. Градинарењето е лично доживување, така што не можам за другите да одговорам што добиле од учеството во општествената градина Бостание – секој си ги собира плодовите од градинарењето сам/а, ако навремено ги забележи меѓу плевелите.

Ќе се обидам да го опишам тоа со цитат од Масанобу Фукуока, селанец од Јапонија, земјоделец, филозоф, микробиолог и основач на школата за природно полјоделство – „Крајната цел на земјоделството не е одгледувањето на земјоделските култури, туку култивирањето и усовршувањето на луѓето“. Во таа насока, се надевам дека градинарењето им овозможува простор за лична култивација и лично усовршување на сите, кои градинарат во општествената градина Бостание.

Колку граѓаните имаат интерес, не само во креирањето на овој заеднички простор, туку и во создавањето нова практика на живеење и однос кон природата?

Димитар: Граѓаните ми делуваат прилично заинтересирани заеднички да градинарат во општествената градина Бостание. Ми се чини дека тие, кои остануваат да градинарат во оваа градина и покрај бројните предизвици успеваат да си ја сосредоточат креативноста и да создаат живи примери за една старо-нова животна практика.

Смислата на поврзувањето, на градинарењето заедно е создавање, влог во иднината – тоа е веројатно и најслаткиот плод. Која е твојата лична перцепција кога ја гледаш целосната слика, која трае и трае?

Димитар: Не можам да ја согледам целосната слика, но токму таа несогледливост на исходите од заедничкото градинарство ми го привлекува вниманието и ме поттикнува секојдневно да си ја преиспитувам перцепцијата кон меѓучовечките плодноси (плодоносни односи).

Каде плови Зелената арка – што ќе се случува на 25 август? 

Димитар: Зелената арка деновиве е упатена кон официјалното отворање на општествената градина Бостание во среда на 25 август, приквечер, иако плови во водите на заедничкото градинарство веќе три берби. Ако дозволат здравствено временските услови во градината, би направиле изложба на фотографиите од општествената градина Бостание, исто така би приготвиле и скромна закуска од свежо собраните плодови, а згора на тоа бостаничките градинар/ки со малку повеќе слух би отпеале, отсвириле и/ли пуштале песни со градинарски мотиви, како во самопрогласена привремена автономна зона или компиратска утопија.

Повелете, иако како и при секој градинарски потфат крајниот исход ќе биде неизвесен до претпоследниот миг!