Израелската актерка Гал Гадот нема да се појави на годинашниот Венецијански филмски фестивал, иако нејзиниот филм „Во раката на Данте“ (In The Hand of Dante) таму има светска премиера. Причината е политичката бура што се крена околу нејзиниот ангажман и најавените протести поради нејзината поддршка за Израел во текот на конфликтот во Газа.

Организаторите воведоа безбедносни мерки без преседан – контролни прстени, скенери, проверки на торби и специјални пропусници, стравувајќи дека 40-годишната актерка може да стане „мамка за демонстрантите“. Активистичката група „Венеција за Палестина“ дури побара од фестивалот да ги повлече поканите за Гадот и Батлер, обвинувајќи ги дека „јавно и активно поддржуваат геноцид“.

Директорот на фестивалот, Алберто Барбера, потврди дека Гадот нема да дојде, нагласувајќи: „Тажни сме за настаните во Газа и смртта на цивилите, особено на децата. Но, нема да ги одбиваме уметниците. Доколку сакаат да бидат тука – добредојдени се“.

Дел од италијанската политичка сцена го нарече бојкотот „непромислен“, посочувајќи дека единствениот „грев“ на Гадот е тоа што е Израелка.

Поделбите се видливи и во самиот Холивуд. Бред Пит, заедно со Хоакин Феникс и Руни Мара, е продуцент на филмот „Гласот на Хинд Раџаб“ (The Voice of Hind Rajab), кој премиерно ќе биде прикажан во Венеција и кој ја реконструира смртта на палестинската девојчица Хинд Раџаб и нејзиното семејство во Газа.

Во пресрет на фестивалот, Гадот се осврна и на неуспехот на филмот „Снежана“ (Snow White), во кој ја играше злобната кралица.

„Бев убедена дека ќе биде голем хит, но по 7 октомври настана огромен притисок врз славните да се изјаснат против Израел. Тоа се одрази и врз филмот“, рече таа.

Иако продукцијата чинеше 270 милиони долари, плус уште 80 милиони за маркетинг, филмот досега заработи околу 200 милиони, што се смета за голем комерцијален пад.

Гал Гадот доби ѕвезда на Булеварот на славните: На свечената церемонија интервенираше полицијата