Оштетена опрема за наводнување, оштетени чешми за пиење на вода, оштетено улично осветлување. Ова е сликата што во изминативе неколку денови може да се забележи на територија на Општина Кисела Вода.

Несовесни граѓани на територија на оваа скопска општина намерно оштетувале системи за наводнување и за осветлување, притоа правејќи материјална штета, но и предизвикале лишување на граѓаните од придобивките од поставената опрема.

Од оваа скопска општина информираат дека во овој период добиваат зголемен број пријави од граѓани за оштетена опрема за полевање на тревата и јавни чешми.

– Според направената анализа и консултации со оператор што ја одржува опремата добивме известување дека најчесто оштетувањата се резултат на човечки фактор. Вандализирањето на прскалките за трева, уличните чешми и фонтани не само што ги лишува граѓаните од придобивките од поставената опрема, туку дополнително предизвикува неконтролирано истекување на драгоцени количества на вода и го уништува урбаното зеленило преку недоволно или прекумерно наводнување – информираат од Општина Кисела Вода.

Меѓу другото, општинските власти апелираат до граѓаните со внимание да се однесуваат кон урбаната опрема и изразуваат огромна благодарност на совесните граѓани кои редовно ги известуваат за настанатите оштетувања за да можеме навремено да се интервенира и да се спречи поголема штета.

За жал, уништувањето урбана опрема не е карактеристично само на територијата на Општина Кисела Вода. Искршени клупи, оштетени канти за отпадоци, запалени контејнери, откорнати цвеќиња, оштетени реквизити на детските игралишта, уништени летниковци, исчкртани информативни табли, можат да се видат речиси во сите скопски општини. Несовесните граѓани времето што го поминуваат на некоја од јавните површини низ градот, наместо за одмор и релаксација го користат за да оштетат дел од урбаната опрема.

Поради несоодветниот однос на дел од локалното население, општините и Градот Скопје, одново издвојуваат средства за веќе постојни реквизити или за веќе засадено зеленило, за обнова или за набавка на нови клупи, канти за отпадоци и контејнери.

И од општините и од Град Скопје, во изјави за „Слободен печат“ велат дека оштетувањето на урбаната опрема и уништувањето на зеленилото воопшто не стагнира во изминатиот период. Според нив, ваквите постапки  нанесуваат голема финансиска штета што дополнително треба да се надоместува, иако веќе биле потрошени пари од буџетите за набавка и поставување на опремата. Градските власти велат дека најмногу оштетувања на урбаната опрема има во Градски парк, Водно и во парк-шумата Гази Баба.

Од Градот посочуваат дека за одредени лица да бидат санкционирани поради уништување на јавното добро треба да бидат фатени на лице место, но како што велат од Град Скопје, на терен такво нешто многу ретко се случува.