Пратениците денеска расправаа околу предложените измени во Законот за граѓанска одговорност за навреда и клевета, кои предизвикаа големи реакции во јавноста кога беа првпат претставени во февруари. Според опозициската ВМРО-ДПМНЕ, со ова законско решение се прави „рестрикција на мисловниот процес“ и оттаму велат дека ќе поднесат амандмани. Пратениците од владејачката СДСМ, пак, оценија дека е отворена дебатата во Парламентот, во работните тела и оти не е во ред да се тврди дека власта со ова на мала врата се обидува да воведе цензура, како што обвини опозицијата.

Пратеничката на ВМРО-ДПМНЕ, Рашела Мизрахи, истакна дека оваа законско решение е „неизменето, некорегирано, нецелосно и прави рестрикција на мисловниот процес“.

– Можеби сметаме дека во плејадата на закони кои што поминуваат низ Парламентот, ќе помине и овој незабележано, но кога-тогаш законот ќе застане на свои нозе меѓу јавноста. Очекувам од новинарската фела да го разгледа уште еднаш и да ги даде своите критики, како и целокупното општество, рече Мизрахи.

Заменик-министерот за правда Агим Нухиу рече дека законските измени поминале неколку фази пред да дојдат на пленарна седница.

– Министерството за правда интервенираше и го прецизираше член 6 – за навреда одговара тој што со намера, со изјава, однесување, објавување или на некој друг ќе искаже за некој друг со определен интегритет едно деграридарчко мислење со кое што се нарушува репутацијата и угледот. Законот е создадено од членови од сите заинтересирани групи, вклучувајќи ги здруженијата на новинарите и синдикати, судии, универзитетски професори и не треба да се сомневаме во нивната компетентност во работната група. При формулирањето на овие одредби на законот за граѓанска одговорност се преземени и критиките на неколку извештаи посебно во делот каде се определува целта на законот за да не се ограничи слободата на изразување, што се однесува на финанскискиот износ, согласно со член 10 од Европската Конвенција за човековите права и Уставот на Република Северна Македонија, рече Нухиу.

Според Миле Лефков од ВМРО-ДПМНЕ, Министерството за правда со овој закон има единствена цел да ги спаси функционерите од власта од јавната критика. Тој апелира и побара зборот „мислење” во предогот да биде заменето со „тврдење”.

Во реплика на пратеникот Лефков, Нухиу рече целта на овој закон не е да се направи цензура врз слободното изразување и слободниот говор или да има барикади за да ги заштити државните функционери. Доказ дека овој закон гарантира поголема слобода на изразување и на мислењето, рече Нухиу, е и фактот дека власта ги намалила нематеријалните штети за навреда и клевета за новинарите и се предлага износот да не биде поголем од 400 евра.

Диме Велковски, пратеник на СДСМ, рече дека основниот темел на ова законско решение е правото на слободата на изразување, како едно од темелните човекови права кое што е особено значајно за постоењето на демократското општество”. Тој посочи дека целта е да се подобри закононското решение.

Собранието денеска одржа и продолженија на две други седници, на кои на дневен ред беа неколку предлог на закони за кои расправата беше завршена поради очекување за нивно гласање или поради отсуство на нивен претставник.