Македонскиот бас-баритон Иван Наумовски, оперски уметник со интернационална кариера и професор на Факултетот за музичка уметност, го најави својот концерт со наслов „Мост“.

Концертот ќе се одржи на 17 април (среда), во Музеј на македонската борба, со почеток во 20 часот, и ќе бидат изведени дела од Р. Штраус, А. Цемлински, Ј. Брамс, А. Берг, Ф. Шуберт, Д. Андовска и Панде Шахов. На концертот Наумовски ќе настапи заедно со професорката Елена Атанасовска-Ивановска, која ќе го придружува на пијано.

Како бас-баритон Иван Наумовски ги завршил своите дипломски студии по соло пеење со највисоки оценки на ФМУ во Скопје, во класата на проф. м-р Марија Муратовска, а магистрира на Универзитетите во Грац и Виена. Како студент е освојувач на три балкански натпревари во Македонија, Црна Гора и Косово.

Наумовски бележи многубројни настапи во земјава со оркестарот на МОБ и Македонската филхармонија, и на рецитали на фестивали во различни градови, како што се: „Скопско лето“, „Денови на македонската музика“, „Интерфест“ и „Есенски музички свечености“.

Низ неговата соло кариера, Иван Наумовски бележи настапи во Норвешка, Австрија, Хрватска, Германија, Чешка и други. Во 2015 година ја доби престижната македонска награда „Виртуози“ во категоријата „Млад уметник“, а во 2016 дебитира во МОБ на отворањето на „Мајските оперски вечери“ со главната улога во истоимената опера „Евгениј Онегин“.

Концертот со наслов „Мост“ е поддржан од Министерството за култура. Влезот на концертот е бесплатен.