Цензурата на содржината со омраза „не е цензура“, изјави денеска високиот комесар на ОН за човекови права, Волкер Турк, неколку дена откако Мета објави дека ќе ја прекине проверката на фактите во САД пред инаугурацијата на Доналд Трамп.

„Дозволувањето говор на омраза и злонамерна содржина на интернет има последици во реалниот живот. Контролата на таквата содржина не е цензура. Мојата канцеларија повикува на одговорност и управување во дигиталниот простор, во согласност со човековите права“, напиша Волкер Турк на Платформата Икс, чиј сопственик, Илон Маск сега е алтер его на Трамп и со години промовира дека програмите за проверка на фактите претставуваат „цензура“.

Allowing hate speech & harmful content online has real world consequences. Regulating such content is not censorship. My Office calls for accountability & governance in the digital space, in line with human rights. pic.twitter.com/mCisUQoygU

— Volker Türk (@volker_turk) January 10, 2025

Пред два дена извршниот директор на МЕТА, Марк Цукерберг изјави дека неговата компанија која раководи со Фејсбук, Инстаграм и Вотсап ќе стави крај на проверката на фактите на сите платформи и ќе ја врати слободата на изразување. Во своето петминутно обраќање тој изјави дека слободата на изразување, ќе ја врати со помош на американската влада односно администрацијата на Трамп. Тој потенцираше дека проверувачите на факти ќе бидат заменети со „забелешки на заедницата“, а ќе се поедностават и нивните политики и фокусот кон намалување на грешките.