Американците кои беа најжестоки во нападите кон српскиот тенисер поради организацијата на „Адрија тур“ на која се заразија неколку тенисери, а меѓу нив и самиот Ѓоковиќ, продолжуваат со нападите откако пристигна во САД каде ќе игра на Мастерс Синсинати и на УС Опен.

Ѓоковиќ веднаш по пристигнување во САД даде интервју за „Њујорк тајмс“ во кое зборуваше за организацијата на „Адриа тур“, како и за одлуката да настапи на УС Опен.

– Искрено не мислам дека направив нешто лошо. Се чувствувам лошо поради луѓето кои се заразија. Дали чувствувам вина за тие кои од тој момент па понатаму се заразија во Србија, Хрватска, во регионот? Нормално не. Да бидам искрен ова беше лов на вештерки. Како може да обвините една личност за се – одговори Ѓоковиќ во дел од интервјуто за весникот.

Прв кој се јави по интервјуто беше Ник Кирјос, австралискиот тенисер.
– Страшно е луѓето да не сносат никаква одговорност – коментираше Кирјос.

– Новак Ѓоковиќ како и многу други врвни спортисти успеа бидејќи беше во состојба да исклучен значителен дел од сомнежите во себе и секогаш да верува во своте можности. Овие квалитети не се гаранција за добар граѓанин во време на пандемија, дури и по многу можности да се научи нешто ново – коментираше тенискиот новинар на „Њујорк тајмс“, Бен Ротенберг.

Најостар во критиките кон Ѓоковиќ беше Бенџамин Харт.
– Навистина сакав да има навивачи на годинешното издание на УС Опен за да можат да го исвиркуваат Новак Ѓоковиќ поради тоа што го изјави. Досега мислев дека неправедно има лоша репутација, но сега и јас сум меѓу тие кои го мразат.