Кога станува збор за започнување на денот, вашиот избор на појадок може да биде клучен во одредувањето како се чувствувате во остатокот од денот. Со повеќе обврски и недоволно време, многумина посегнуваат по брзи и лесни опции за појадок, што може да направи повеќе штета отколку корист, особено кога станува збор за воспаленија и вишок килограми.

Многу популарни намирници, кои се претставени како здрава, всушност можат да ја нарушат работата на метаболизмот и како резултат на долготрајното консумирање да доведат до низа здравствени проблеми. Диететичарите Крутика Нанавати и Џеси Федер за „She Finds“ издвоија две популарни опции за брз појадок кои всушност би било подобро да ги прескокнете за најважниот оброк во денот.

Енергетски барови

Кога сте во брзање, а наутро веројатно сте, енергетскиот бар е одличен избор бидејќи лесно се јаде во движење како ужина или лесен појадок. Иако овие барови често се продаваат како здрави опции, диететичарите тврдат дека се високо преработени и полни со шеќер и други адитиви.

„Многу енергетски барови достапни на пазарот се полни со додаден шеќер и калории, а во однос на нивниот нутритивен состав, неверојатно потсетуваат на чоколатца“, истакнува Нанавати.

Честото јадење премногу шеќер е еден начин да се подготвите за повисоки нивоа на воспаление и помалку ефикасен метаболизам, па затоа е добра идеја да избегнувате верзии на овие слатки купени во продавница.

Ако навистина сакате да ги јадете овие задоволства, најдоброто нешто што можете да го направите, а да се грижите за вашето здравје е да направите свои енергетски ужинки.

„Правењето енергетски барови дома овозможува контрола врз употребените состојки, обезбедувајќи помалку шеќер и поголем дел здрави, хранливи состојки како што се јаткастите плодови, семките и сувото овошје“, советува диететичарот.

Овошни сокови

Да, добро прочитавте. На списокот на овие диететичари се и овошните сокови. Но, секако, станува збор за засладените овошни сокови што ги купувате во продавница, а не за оние што ги подготвувате од свежо овошје дома.

„Иако овошните сокови може да изгледаат поздрави од слатки безалкохолни пијалоци, тие можат да имаат голема содржина на шеќер и калории. Недостатокот на влакна во овие пијалоци доведува до брза апсорпција на шеќерот, потенцијално предизвикувајќи флуктуации на шеќерот во крвта и зголемен глад“, додава диететичарот.

Тој советува секогаш кога можете, одвојте време дома да си направите природен сок од овошје и зеленчук, кој ќе ви овозможи да знаете што сте консумирале во напитокот, пренесува хрватски „Индекс“.