Минатите две последователни години модната дизајнерка Олгица Ѓоргиева имаше полни раце работа, а својата креативна енергија ја распосла и низ Европа. И покрај коронакризата, нова понуда од странство веќе е „на маса“, а се чека октомври за финалната реализација. Во меѓувреме, Олгица лансираше колекција на маички кои одлично ги прифати публиката, и со оригиналните дизајни ја врати „белата маичка“ на голема врата на модната сцена.

Минатите две последователни лета работеше на костимографија на претстави во странство, во Австрија и Грција. Какви проекти ти одложи коронакризата за ова лето и што моментно те окупира? 

– Благодарна сум на искуствата и проектите од изминатата година. Тие донесоа една нова, свежа и креативна енергија кај мене. Отворија размислувања и гледишта за многу работи. Убавата работа е во тоа што добро сум ги завршила споменатите проекти, така изминатиот период добив понуда од друга интернационална куќа да работам како костимограф на проект. Засега проектот сè уште е на маса, па се надевам дека ситуацијата со коронакризата во наредниот период нема премногу да се влоши. Премиерата е закажана за октомври и доколку со сигурност се реализира проектот, со задоволство ќе ве известам за приказната.

Што ни носиш со летната колекција?

– Оваа сезона ја прескокнав стандардната сезонска колекција, потребите во периодов малку се променети и затоа одлучив да ги слушнам клиентите. Наместо тоа пуштив линија на маички. Наредната недела излегува нов производ, доста креативен и нов за мене, на кој навистина му се радувам. Во моментот сум посветена на моите клиенти и на нивните потреби во периодот што следува.

На кои жени им се обраќаш? 

– Жените за кои работам се жени кои сакаат дизајн и оригинални парчиња облека.

Петнаесет години си активна на модната сцена, кои беа најтешките предизвици со кои требаше да се избориш за да стигнеш дотука?

– Предизвици имаше многу. Но во ни еден момент не го добив чувството да се откажам, туку напротив, секогаш трчав екстра милја. Ништо во животот не е права линија и сè во животот сфаќам како процес, па така и овој мој развој низ годините. Благодарна сум на секое мое искуство, и добро и лошо, сите тие од мене направија најверојатно похрабра личност, која одлучила да се бори во животот, а не да се откажува. Само така може да се оди напред.

Колку македонската жена е модно освестена? 

 – Има секогаш секакви примери, меѓутоа сè уште има уште многу работа на тоа поле.

Каква ни е модната култура во секојдневниот живот?

– Јас некако низ годините сфатив дека во земја како нашата малку е потешко да се функционира како заедница, така што многу одамна почнав да делувам како едника. Без очекувања го давам тоа што го носам со себе и се обидувам да придонесам во делот каде што сум добра и каде што можам. Веројатно, ако сите како поединци би го направиле тоа, прогресот во одредени сегменти, меѓу кои и модната култура, сигурна сум дека ќе биде забележан.