Фудбалскиот свет го запозна Ерлинг Халанд во дресот на Ред Бул Салцбург, откако младото момче се истакна во групната фаза од Лигата на шампионите. А пред да замине во Австрија, норвешкиот голгетер играше за Молде, кој беше предводен од Оле Гунар Солскјер.

Поранешниот играч и поранешен менаџер на Манчестер јунајтед, откри како Халанд можел да стигне на „Олд Трафорд“ пред пет години. И тоа за прилично ниска сума.

– Го повикав Јунајтед околу шест месеци пред да седнам на нивната клупа, им кажав за напаѓачот што го имаме во Молде, но тие не ме послушаа – рече Солскјер за „Сан“.

Седна на клупата на „црвените ѓаволи“ на крајот на 2018 година и додаде дека во прашањето беше прилично симболична цена за, според многумина, моментно најдобриот напаѓач на светот.

– Побарав четири милиони фунти, но тие не сакаа да го ангажираат – изјави Солскјер.

На крајот, Халанд заврши на другата страна од Манчестер, минатото лето од Борусија Дортмунд се пресели на „Етихад“ и за 60 милиони евра го облече дресот на „граѓаните“.