Оксфорд го прогласи „гниење на мозокот“ (Brain rot) за збор на годината за 2024 година.

Имено, ова се случи поради загриженоста за бескрајното „скролање“ на социјалните мрежи и содржините што го затапуваат умот.

„Гниење на мозокот“ се дефинира како „наводно влошување на нечија ментална или интелектуална состојба, особено како резултат на прекумерна употреба на материјал (сега особено онлајн содржина) што се смета за тривијален или непредизвикувачки“.

Повеќе од 37.000 луѓе гласаа за еден од шесте зборови во потесниот избор на „Оксфорд јуниверзити прес“ (Oxford University Press), кој го издава Оксфордскиот речник, пишува „Гардијан“.

Секоја година, Оксфорд го објавува зборот на годината, кој во претходните години вклучуваше „риз“ (rizz) и „климатски итни случаи“(climate emergency), со цел да ги одрази моменталните расположенија и трендови.

Од „Оксфорд јуниверзити прес“ велат дека терминот „гниење на мозокот“ доби ново значење оваа година како „термин што се користи за изразување загриженост за ефектите од консумирање прекумерни количини на неквалитетна онлајн содржина, особено на социјалните медиуми“.

Иако неодамна доби на важност, првата забележана употреба на зборот беше во 1854 година во книгата „Валден“ од Хенри Дејвид Торо.

Претседателот на Oxford Languages, Каспер Гретвол, рече дека „гниењето на мозокот“ зборува за една од согледаните опасности од виртуелниот живот и за тоа како го поминуваме слободното време.

„Фасцинантно е што зборот е усвоен од генерацијата Зет и Алфа, заедниците кои се во голема мера одговорни за употребата и создавањето на дигиталната содржина на која се однесува терминот“, рече Гретвол.

Во потесниот избор за збор на годината беа вклучени термините „пристојно“ (demure) што се однесува на резервирано или одговорно однесување, „динамично оценување“ (dynamic pricing), каде што цената на производот или услугата варира во зависност од побарувачката, „знаење“ (lore) како збир на факти и заднински информации за некого или нешто, „романтазија“ (romantasy), жанр на фикција што комбинира романса и фантазија и „слоп“ (slop) што означува неквалитетна онлајн содржина генерирана користејќи вештачка интелигенција.

За потесниот избор на зборови одлучуваше четиричлена комисија, а при изборот на победниците беа земени предвид јавното гласање, коментарите и другите анализи.

Овогодинешниот збор на Кембриџ, објавен минатиот месец, беше „манифестен“ (manifest), што се однесува на позитивно размислување за некоја цел со верување дека тоа ќе влијае на поверојатна реализација.

Зборот е пребаруван 130.000 пати на онлајн речникот на Кембриџ.