Во последните шест дена, регистрирани се 57 нови случаи на инфекции со коронавирусот во земјава, а четворица пациенти починале – сите на возраст од над 70 години и невакцинирани, покажува последниот извештај на Институтот за јавно здравје.

Двајца од починатите се од Скопје, а по еден од Битола и Тетово. Во однос на минатата недела, бројот на регистрирани новозаболени од ковид е намален за 48,6 отсто.

„Регистрирани сe 57 нови позитивни случаи, со намалување од 48,6 отсто во однос на минатата недела. Во тековната недела, регистрирани се заболени лица во општините од осум градови. Најголем дел од регистрираните случаи се од Скопје (n=39; 68,4 отсто), a највисока инциденца е регистрирана во Делчево (14,7/100,000)“, пишува во извештајот на ИЈЗ.

Заболените од ковид се во сите возрасни групи но, најголем број на случаи има пријавено за возраста група над 60 години. Тројца починале во болнички услови, а кај три лица биле регистрирани коморбидитети. Од 15 септември во земјава се регистрирани вкупно 1,560 заболени и 20 починати лица од корона вирусот.

Во изјава за ТВ24, доктор Александар Петличковски, вели дека во моментов ковидот не претставува сериозна закана по здравјето на луѓето. Тој посочува дека бројката на позитивни случаи исто така опаѓа и дека потребата од хоспитализација и интензивна нега е ниска.

Но за луѓето кои се со сериозни хронични болести, за повозрасните луѓе и за оние со ослабнат имунитет се препорачува вакцинација против коронавирусот, бидејќи ковидот за овие групи може да претставува посериозен ризик, вели д-р Петличковски.