Почнаа активностите на дежурните екипи од Зимската служба на Град Скопје, изминатата ноќ интервенирано со 45 тони индустриска сол фрлена на критичните точки на подрачјето на градот

Екипи на Зимската служба на Град Скопје и ЈП „Улици и патишта” во текот на изминатата ноќ фрлиле 45 тони индустриска сол на сите критични црни точки и на поголемите булевари и улици во градот со седум специјални возила на Град Скопје. Како што информираат од претпријатието се чистеле првите снежни наноси на булеварот Александар Македонски, на улиците Радишанска, Индира Ганди, Коце Металец, како и на улицата Христо Татарчев на последна автобуска постојка број 24.

Оттаму додаваат дека координираните активности за зимско оддржување на улиците во надлежност на Град Скопје ќе продолжат со целокупната механизација и расположливиот кадровски потенцијал.

Градот Скопје и јавните градски претпријатија за претстојната зимска сезона 2023/2024 обезбедија околу 3.500 тони индустриска сол, од кои околу 1000 тони се залиха од минатата зимска служба. Обезбедени се и 200 тони ладна асфалтна маса за санација на оштетените сообраќајни површини. Со Програмата се предвидени обемот, динамиката и нивото на одржување на улиците, со цел да се обезбеди непречено и безбедно одвивање на сообраќајот на градските сообраќајници во зимски услови. Кoловозните ленти при одржувањето во зимски услови ќе се расчистуваат  според приоритети, како што се критичните точки, пристапите до објектите од витално значење за граѓаните и сообраќајниците од посебно значење за функционирање на сообраќајот /стопански објекти/, информираат од „Улици и патишта“.

Другите јавни претпријатија се задолжени во рамки на Програмата и своите надлежност да обезбедат механизација и опрема, а имаат изготвено и посебни подпрограми за расчистување на јавни површини во зимски услови.

Кризниот штаб апелира до граѓаните, урбаните заедници, куќните совети и претпријатијата, навреме да преземаат мерки за отстранување на возилата од коловозите, расчистување на пешачките приоди, приодите до објектите и покривите на објектите. Во спротивно, полицијата и комуналните инспектори, врз основа на Законот за јавна чистота ќе изрекуваат казни. Посебно се апелира до возачите да ја почитуваат законската регулатива за задолжително користење зимски гуми, со што ќе придонесат во организирањето на оптималната безбедност на сообраќајот во зимски услови.