Според првичните сознанија од извршениот увид на местото на несреќата кај Рашче, каде автомобил со патници излета и падна во водите на Вардар, со возилото управувало едно од починатите лица.

Како што соопштија од Основното јавно обвинителство – Скопје, заедно со автомобилот, од водите на Вардар беа извадени три починати женски лица, за кои е издадена наредба за обдукција. По уште едно лице се трага, додека во автомобилот патувало и дете кое е пронајдено повредено надвор од возилото, па е пренесено на Клиничкиот центар.

– И покрај исклучително тешките услови на непристапен терен, беа преземени сите дејствија за обезбедување траги и докази со цел да се утврдат причините за несреќата – се вели во соопштението.

Обвинителството ќе издаде наредба и за вештачење на автомобилот, а се разговара и со очевидци на настанот и блиски на семејството со цел да се испитаат сите околности.

Според информациите што вчера беа соопштени од полицијата, во автомобилот се наоѓале пет лица. Станува збор за брачна двојка која патувала со едниот син и снаата од другиот син.

Петтиот патник било четиригодишно дете кое излетало од автомобилот пред тој да падне во реката. Детето го пронашле минувачи, кои повикале брза помош и тоа било однесено во болница.

На местото на несреќата пристигнале полиција и нуркачи, кои трагале по останатите лица.

Во СВР Скопје попладнето во 16 часот било пријавено дека на локалниот пат за селото Рашче, патничко возило излетало од патот и паднало во реката Вардар. На местото на настанот веднаш се упатиле полицајци и Итна медицинска помош, а екипа на САЕ Тигар презела мерки за вадење на автомобилот.

„Во 18 часот од ГОБ „Св. Наум Охридски“ сме известени дека кај нив од страна на случајни минувачи е донесено четиригодишно дете, кое потоа е пренесено во Клиничкиот центар“, соопштија синоќа од полицијата.