Денеска во просториите на Ракометната федерација на Македонија (РФМ) се одржа прес-конференција на која официјално беше промовиран „Трофеј Македонија“ и најавен почетокот на Ракометниот караван 2025. Овие два значајни спортски проекти имаат за цел да го подигнат ракометот на повисоко ниво, да ја зајакнат љубовта кон спортот кај најмладите генерации и да го доближат ракометот до сите љубители низ целата наша земја.

На прес-конференцијата присуствуваа Александар Стефанов, претседателот на РФМ, Влатко Тасевски, генерален секретар и Филип Миркуловски, координатор на машките селекции. Со „Трофеј Македонија“ се отвора можност за уште поголема спортска афирмација и создавање традиција која ќе го збогати спортскиот календар.

Преку „Ракометниот караван“ ќе се реализираат активности низ целата земја со цел ракометот да се доближи до младите таленти и идни шампиони. На „Ракометниот караван“, специјални гости на овој настан ќе бидат Филип Миркуловски, Индира Кастратовиќ и Елена Ѓорѓиевска. На 20 септември 2025 година, со почеток од 11.30 часот, во спортскиот центар „Билјанини Извори“ – Охрид, ќе се одржи настан под мотото: „Ракометот е тука – дали си подготвен?“

Воедно од периодот од 18 до 20 септември 2025 година, спортскиот центар „Билјанини Извори“ ќе биде домаќин на „Трофеј Македонија“. Женската сениорска ракометна репрезентација на Македонија ќе биде носител на овој турнир и ќе ја има можноста пред својата публика да се соочи со силни репрезентации како Грција, Египет и Тунис.

„Трофеј Македонија“

СЦ „Билјанини извори“ – Охрид

18 септември

18.15 часот Грција – Египет
20.30 часот Македонија – Тунис

19 септември

18.15 часот Тунис – Грција
20.30 часот Македонија – Египет

20 септември

14.00 часот Египет – Тунис
16.30 часот Македонија – Грција

Преземено од: Спорт.ком.мк