Само 24 часа по освојувањето на титулата со Париз, македонскиот репрезентативец Ти-Џеј Шортс и официјално е нов кошаркар на грчкиот гигант Панатинаикос. Актуелниот европски шампион денеска го промовираше како своето најново засилување, со што Шортс ќе продолжи да настапува во најсилната европска клупска конкуренција, Евролигата.

Минатата сезона, Шортс блескаше на паркетот и беше сериозен кандидат за наградата за најкорисен играч (МВП) во Евролигата, благодарение на своите одлични настапи и клучна улога во успехот на францускиот тим.

Сега, пред него е нов предизвик. Со двегодишен договор, Шортс ќе биде дел од тимот на Панатинаикос кој со големи амбиции ќе атакува на нова европска круна и враќање на шампионската титула на домашната сцена, откако годинава таа заврши во рацете на Олимпијакос.