Грег Попович, еден од најуспешните тренери во историјата на НБА лигата, и официјално се повлече од тренерската функција во Сан Антонио спарс, објави денеска клубот од Тексас.

Седумдесет и шестгодишниот Попович сезонава беше отсутен поради здравствени причини, што воедно беше и главната основа за одлуката која ја донесе заедно со своето семејство и раководството на Спарс.

Сепак, тоа не значи дека Попович целосно го напушта клубот. Напротив тој ќе продолжи да биде дел од организацијата, но на помирна позиција, како претседател на кошаркарските операции. Веќе работи на неколку проекти поврзани со претстојното лето.

Попович е дел од Сан Антонио уште од 1996 година и во меѓувреме стана тренер со најмногу победи во историјата на НБА. Под негово водство, Спарс освоија пет шампионски титули, а тој самиот е веќе влезен во „Куќата на славните“.

Интересен е и податокот дека Попович има балкански корени, татко му потекнува од српско семејство, а мајка му од хрватско.

За илустрација, во 1996 година, кога Попович го презеде водството на Спарс, Југославија освои сребро на Олимписките игри, Никола Јокиќ имаше само една година, а Божидар Маљковиќ славеше во Евролигата со Панатинаикос.