Првиот човек на Хајдук, Иван Билиќ одржал состанок со тренерот Џенаро Гатузо на кој се разговарало и за неговата иднина, а според информациите на хрватските медиуми истиот поминал во позитивно.

По состанокот кој траел околу час и половина двете страни се договориле да продолжат заедно во предизвиците кои го очекуваат клубот од Сплит во продолжение од сезоната.

Хајдук во петокот го победи Динамо во деребито, но по тој триумф во центарот на вниманието се најде и Гатузо кој даде поддршка на Никола Калиниќ кој неодамна доби отказ од позицијата спортски директор.

„За Никола Калиниќ не може да се каже дека е лажго. Тој ме убеди да дојдам во Сплит, му благодарам и оваа победа ја посветувам на него“, изјави Гатузо на прес-конференцијата по тој натпревар.

Изјавата привлече внимание затоа што Калиниќ претходно го критикуваше Билиќ и поради тоа се најавуваше дека можеби Гатузо е следниот кој ќе биде отпуштен, тоа како што стојат работите нема да се случи.