Осумдневен притвор му е одреден на младиот скопјанец кој вчеравечер се обидел да запали албанско знаме, информираа вечерва од Министерството за внатрешни работи.

20-годишното момче вчера околу 23 часот на подрачјето на општина Центар се обидел да запали албанско знаме, велат од полицијата.

„Единицата за насилен криминал при СВР – Скопје поднесе кривична пријава против К.К., на возраст од 20 години, поради сторено кривично дело по член 319 од КЗ. Синоќа во 23:10 часот, на подрачјето на Центар во Скопје, полициски службеници го лишиле од слобода К.К., кој бил затекнат при обид со запалка да запали знаме. Знамето и запалката се одземени, а тој е задржан во полициска станица. Против него е поднесена кривична пријава по брза постапка. Од судија на претходна постапка одредена му е мерка притвор од осум дена.“, пишува во соопштението од МВР.