Никој не знае што се случи со десетици од клупите што беа поставени пред неколку месеци покрај патеката на кејот на Вардар, кои едноставно ги „снема“. За тоа уште пред речиси еден месец алармираа скопјани, кои рекреираат на овој простор, но освен граѓаните за проблемот не се огласија ниту Град Скопје ниту ЈП „Паркови и зеленило“, што е невообичаено, затоа што станува збор за урбана опрема поставена од Градот и платена со пари од градската каса.

Не се знае ни дали случајот е пријавен како кражба, дали има истрага, за колкава штета станува збор. Ваква информација од градоначалничката Данела Арсовска побара и Советот на Град Скопје, но до почетокот на денешната седницата ни советниците, како ни претходно граѓаните,  не беа удостоени со одговор. Па, така, ним не им преостана ништо друго освен самите да продискутираат за проблемот и да ја задолжат градоначалничката да достави информација за кражба на урбана опрема на кејот на Вардар.

Претседателот на Советот Трајко Славески објасни дека информацијата ја побарал по реакциите по социјалните мрежи и откако Градот и јавното претпријатие не излегле со никакво објаснување. Тој и на „самото место“ се уверил дека навистина недостасуваат голем дел од новите клупи.

Десетици новопоставени клупи се украдени и тоа во деловите каде што има пристап со возила. Но, градоначалничката Арсовска не нѐ почести со информација барем да видиме дали е поднесено барање за истрага и до каде е истрагата и што може да се направи за да се постават нови клупи кои нема да бидат лесен плен за крадците – рече Славески на денешната седница.

За советникот Никола Пановски ова само покажува дека некој не се грижи доволно и дека и останатите ќе ги украдат ако нешто не се преземе.

 Точно 29 клупи недостасуваат. Старите клупи беа вдлабени под плочките, зацементирани, и не е јасно зошто се тие сосема тргнати наместо само да им се замени дрвото, а се ставени нови со шрафови, кои лесно се откорнати и однесени. Очигледно е дека тие се однесени и искористени некаде. Ако вака спие Градот, веројатно и другите ќе ги украдат. И не треба пријателите да ни кажуваат дека се украдени клупите, чуварот на паркот треба да пријави и една клупа ако фали – истакна Пановски на говорницата.

За Гордан Шутаров, советник од СДСМ, чуден е молкот на ЈП „Паркови и зеленило“.

Ме чуди зошто нема никаква информација од јавното претпријатие, нивниот молк ми зборува дека сакаат оваа работа „под тепих“ да ја стават. Станува збор за 29 клупи, колкава е нивната вредност, колкава штета е направена? – праша Шутаров.

И навистина зачудува тоа што нема реакција од „Паркови и зеленило“ затоа што досега тие јавно реагираат за речиси секое вандализирање на урбаната опрема. Притоа на седницата присуствуваше и директорот на ЈП „Паркови и зеленило“ Сефи Шабани, но тој не излезе за да даде какво било објаснување за исчезнатите клупи на кејот.

Клупите на кејот на Вардар беа поставени во октомври минатата година.

По повеќе од една деценија, Град Скопје ги заменува старите и оштетени клупи и поставува нови на пешачката патека на кејот на реката Вардар. Континуирано се реализираат активности за подобрување на условите за посетителите и рекреативците на кејот на реката Вардар, како исполнување на барањата на граѓаните за разубавување на едно од омилените места за прошетки во градот – се пофали Арсовска пред четири месеци.

Новите клупи за плочките на пешачката патека се (беа) прицврстени со по четири шрафа.