Едно ново истражување ги анализираше светските дестинации за да утврди кои се најпогодни за жените кои патуваат сами, а Хелсинки се најде на врвот, додека Загреб на второто место, пишува „Тајмаут“.

Бројот на жени кои патуваат сами низ светот моментално е поголем од кога било, а реалноста е дека некои дестинации многу подобро им одговараат на жените кои патуваат сами од другите.

Новата студија на „Дипендајв“ (DIPNDIVE) даде детална анализа за лоцирање на најдобрите дестинации, оценувајќи бројни фактори – од временските услови, пријатноста и безбедноста на местото до просечната цена на живеење, просечната цена на хотелот и бројот на бесплатни атракции што се нудат.

На врвот на листата на најдобри дестинации во светот за жени кои патуваат сами се најде Хелсинки, главниот град на Финска.

Имено, Хелсинки е рангиран како трет најбезбеден град општо со оценка 75,3. Градот е исто така второто најпријатно место, со импресивна оценка за пријателство од 90 и има неколку бесплатни атракции кои се нудат наспроти малку повисоките трошоци за живот и хотелските цени.

Хелсинки се издвојува по своите одлични културни места, како што се Хелсиншкиот уметнички музеј и Финската сала, која повторно се отвора по обемните реновирања. Покрај тоа, Хелсинки може да биде база за истражување на други пејзажи во Финска.

Второто место на листата го зазеде Загреб во соседна Хрватска, додека Берлин на третото место.

Целосната листа на најдобри дестинации за соло женски патници вклучува:

– Хелсинки, Финска

– Загреб, Хрватска

– Берлин, Германија

– Сингапур, Сингапур

– Варшава, Полска

– Чикаго, САД

– Мадрид, Шпанија

– Виена, Австрија

– Њујорк, САД

– Будимпешта, Унгарија