Одбраната на Мијалков ги осуди критиките упатени кон Апелациониот суд
Одбраната на Сашо Мијалков ја поздрави одлуката на Апелациониот суд во Скопје, велејќи дела тоа е „законита и праведна и заснована на доказите и фактите кои се наведени во жалбата поднесена против првостепената пресуда”.
Препорачано
„Во текот на целата главна расправа одбраната укажуваше на бројните повреди на законот. Повреди кои доведоа до неоснована и правно неиздржана пресуда. Наместо да одговори на сите отворени прашања околу незаконското следење на комуникации, Основниот суд без аргументи и докази донесе осудителна пресуда против нашиот клиент. Пресуда за која беше јасно дека нема да ја издржи проверката во повисокиот суд”, стои во соопштението на одбраната на Мијалков.
Тие велат дека актуелните политички напади врз судскиот совет во Апелациониот суд во Скопје кој одлучуваше по поднесените жалби за предметот се „неприфатливи и заслужуваат најсериозна осуда”.
Одбраната се уште ја нема добиено пресудата на Апелациониот суд во Скопје и се уште не ги знае аргументите и насоките на второстепениот суд. Знае само дека се изразува “загриженост” или “згрозување” од највисоки државни функционери од извршната власт. Тоа е директно мешање и вршење притисок врз судската власт која мора да биде независна. Уште позагрижувачки е дека таквиот притисок е јавен и покажува дека оправдан бил стравот за политичко мешање уште од самиот почеток на постапката и се влијаело да се донесе првостепена пресуда каква што беше донесена, додаваат тие.
Одбаната на Сашо Мијалков вели дека за „притисоците и мешањето” во судската власт ќе го информираат Судот за човекови права во Стразбур, бидејќи, како што велат тие „се нарушуваат правата на нашиот клиент за фер и правично судење кое во ваква атмосфера и хајка врз судиите е невозможно тоа да се добие”.
Ниту Претседателот на државата, ниту министрите во владата не се тие кои треба да носат судски одлуки. Тоа право им припаѓа исклучиво на оние кои дале заклетва дека ќе делат правда и биле избрани за тоа, а се останато е недозволено мешање кое го урива интегритетот на судството кој заради политичките влијанија е сериозно разнишан, заклучуваат тие.
Апелација ја укина и втората пресуда, Сашо Мијалков куртули од 20 години затвор
