Македонската одбојкарска репрезентација ги започна завршните подготовки за квалификацискиот финиш на патот кон Европското првенство 2026. Избраниците на селекторот Јошко Миленкоски се собраа во Маврово, каде што во наредните десет дена ќе се подготвуваат за клучните дуели против Грузија и Грција.

На подготовките се повикани 16 репрезентативци, а по кампот во Маврово, националниот тим заминува за Софија, каде што на 29 и 30 јули ќе одигра два контролни натпревара со силната селекција на Бугарија.

Завршнта фаза од подготовките ќе се одвива во Скопје, каде што во салата „Борис Трајковски“ ќе се одржи традиционалниот меморијален турнир „Бранко Хаџи Иљоски – Чајка“. Турнирот ќе се одигра од 5 до 7 август, а Македонија ќе ги одмери силите со Бугарија и Швајцарија.

Квалификациската завршница почнува на 13 август кога нашите одбојкари ќе гостуваат кај Грција во Атина, а четири дена подоцна на 17 август Македонија ќе биде домаќин на Грузија во Скопје. Натпревари што ќе го одредат нашиот пласман на континенталниот собир.