Осумдесет и две години од стрелањето на 12 младинци, за време на Втората светска војна, беа одбележани денеска во месноста Моклиште во кавадаречкото село Ваташа. Беше положено цвеќе пред споменикот и бистите на младите луѓе.

– Тие беа млади, со соништа, љубови, со живот пред себе. Но, во мигот кога слободата беше задушена, тие не молчеа. Не се скрија. Се исправија. Се издигнаа. Со голи раце, но со огнени срца, го избраа отпорот наместо покорот. Правдата наместо стравот. Македонија – наместо себеси – рече кавадаречкиот градоначалник Митко Јанчев.

Тие беа обични момчиња, истакна тој, а станаа вечни херои.

– Никогаш нема да дозволиме да бидат заборавени – порача градоначалникот.

Историски час одржа кустос историчар Натка Китева од Музеј галеријата во Кавадарци.

Масакрот во Ваташа се случил на 16 јуни 1943 година, кога биле стрелани 12 млади од селото Ваташа во близина на Моклиште кај месноста „Чаир“. Колежот го извршила бугарската воjска и полициски одреди на чело со капетан Борис Жеглов, поручник Борис Костов и подофицер Петко Опреков под команда на полковник Љубен Апостолов, командант на 56. велешки пешадиски полк од Петтата бугарска армија.