Одбележани 153 години од раѓањето на Гоце Делчев
Гоце Делчев е дел од македонскиот идентитет и неговото дело не смее да биде заборавено, порача Мицкоски
Во црквата „Свети Спас“ во Скопје денеска се одржа централното чествување по повод 153-годишнината од раѓањето на великанот на македонското револуционерно дело и државност, Гоце Делчев. Цвеќе положија премиерот Христијан Мицкоски, претставници на Собранието, претседателката Гордана Сиљановска-Давкова, лидерот на опозициската партија СДСМ, Венко Филипче, како и делегации на други институции, партии, граѓански здруженија,…
Препорачано
Мицкоски го честиташе денот од раѓањето на великанот на македонското револуционерно дело, Гоце Делчев и посочи дека македонската Влада во иднина треба да има традиција во чествувањето на овој ден, бидејќи, како што рече, Гоце Делчев е дел од македонскиот идентитет.
– Дозволете ми на целата македонска јавност да го честитам родениот ден на македонскиот великан, идеолог и јунак Гоце Делчев. Тоа што го правевме во минатото продолжуваме да го правиме и како Влада. Цениме дека македонската Влада треба да има традиција во иднина да го чествува овој ден, бидејќи ова е наш македонски великан, којшто е дел од македонскиот идентитет
Во чест на раѓањето на великанот на македонското револуционерно дело и државност Гоце Делчев, повеќе делегации денеска положија цвеќе во црквата „Св. Спас“ во Скопје.
Гоце Делчев е роден на 4 февруари 1872 година во Кукуш, во семејството на Султана и Никола. Се школувал во гимназијата во Солун и на Воената академија во Софија. Учителствувал во Штип, а како член на Централниот комитет на ТМОРО работел на создавање мрежа на бази, комитети и комитски чети на Организацијата.
Како член на ТМОРО, беше наречен апостол на револуцијата. Како голем хуманист, учител и борец, организирајќи ја борбата за слобода на македонскиот народ, тој ја обиколил целата држава. Противниците на македонското револуционерно дело во Гоце Делчев гледале најголем непријател и се обидувале на секој начин да го ликвидираат.
Учествувал на Солунскиот конгрес на ВМРО (1896), а до 1901 година бил задграничен претставник на ВМРО во Софија. На 4 мај во 1903 бил убиен од турска војска во селото Баница, на пат кон Сер.
Саркофагот со посмртните останки на Гоце Делчев од 1946 година се наоѓа во дворот на црквата „Св. Спас“ во Скопје.
