Јапонскиот град Нагасаки денеска ја одбележа 76 -годишнината од атомското бомбардирање на овој град за време на Втората светска војна, а градоначалникот Томихиса Тауе апелираше до јапонската влада да земе поактивно учество во ослободувањето на светот од нуклеарно оружје.

Нема точни податоци за бројот на жртвите, но се проценува дека најмалку 74.000 луѓе го загубиле животот во Нагасаки, а илјадници луѓе починале од нуклеарно зрачење и последиците од зрачењето во неделите, месеците и годините по нападот.

Тауе ја повика владата во Токио да го потпише и ратификува договорот на Обединетите нации за забрана на нуклеарно оружје и да се приклучи на договорот како набудувач на првиот состанок на земјите потписнички, објави агенцијата Кјодо.

По едноминутното молчење точно во 11:02 часот по локално време, во времето кога беше фрлена атомската бомба на 9 август 1945 година, Тауе го нарече Договорот за неширење на нуклеарното оружје „нов хоризонт“ за нуклеарно разоружување, но исто така изрази загриженост за зголемената опасност поради нуклеарната трка во светот.

Кјодо наведува дека премиерот Јошихиде Суга не се занимавал со темата на договорот за забрана на нуклеарно оружје кога им се обратил на насобраните, меѓу кои имало и преживеани и семејствата на жртвите.

„Како единствена земја во која е фрлена атомска бомба, должност на Јапонија е да ги води напорите на меѓународната заедница, чекор по чекор, кон сознанието дека светот треба да биде ослободен од нуклеарно оружје“, рече Суга.

Генералниот секретар на ОН, Антонио Гутереш, исто така, најави влегување во сила на договорот за забрана на нуклеарно оружје, наведувајќи дека подготвеноста на САД и Русија да се вклучат во дијалог за контрола на вооружувањето дава „причина за надеж“, но предупреди дека уште допрва доаѓа многу работа.