Вкупно 450 апликативни формулари од 63 општини се доставени до архивата на Министерството за локална самоуправа заклучно до вчера (23.04.2025 година) за вториот јавен повик за поддршка на инфраструктурни општински проекти.

„Од нив 36 општини аплицирале со проекти во вредност од максимумот на финансиски средства кои им следуваат согласно формулата по глава на жител. 27 општини имаат можност да аплицираат со уште проекти до максимум предвидената сума, а 17 општини воопшто немаат поднесено апликации“, соопшти министерот за локална самоуправа, Златко Перински.

Општините што не аплицирале се: Сарај, Центар, Чаир, Шуто Оризари, Липково, Пробиштип, Валандово, Росоман, Боговиње, Врапчиште, Маврово Ростуше, Теарце, Дебар, Струга, Битола, Крушево и Долнени.

Тој апелираше до сите локални самоуправи да ја искористат оваа можност и да го запазат законски предвидениот рок за пријавување кој завршува на 30 април 2025 година.

Во вториот јавен повик предвидени се до 15 милијарди денари за капитални и инфратруктурни проекти во локалните самоуправи.

И од првиот, а сега и од вториот јавен повик, се покажало дека најголемиот интерес кај локалните самоуправи се однесува на подобрување на патната инфраструктра – од 288 проекти 225 се однесуваат токму на подобрување на патната инфраструктура, рече Перински. Има апликации и за подобрување на животната средина, за изградба на училишта, градинки…