Прочуениот гитарист настапува во подмладен состав, кој го сочинуваат неговиот син Јан Стефановски на тапани и Иван Кукиќ на бас гитара.

Музичкиот уметник со светско реноме, гитаристот Влатко Стефановски, тргна на регионална турнеја. На концертите, покрај добро познатите хитови, ќе претстави и ново, реномирано студиско издание на „Тафталиџе шафл“ (Taftalidzе Shuffle). Подмладената тројка, која покрај Влатко ја сочинуваат неговиот син Јан Стефановски на тапани и Иван Кукиќ на бас гитара, ја започнаа својата летна турнеја во Панчево, по што заминаа за Хрватска.

Триото Влатко Стефановски денеска ќе настапи во Загреб на „Бундекфест“, а следниот ден во Осиек. Турнејата продолжува на 4 јули со концерт во Палиќ, по што следат настапи во Трогир на 9 јули, во Шибеник на 10 јули и на Брач на 11 јули. Словенечката публика ќе има можност да види концерт во Нова Горица, на 17 јули, додека на 20 јули, Влатко Стефановски ќе настапи во Будва, на култната манифестација „Град Театар“.

На 30 јули ќе има голем концерт на стадионот „Ташмајдан“ во Белград.

Како што соопшти „Кроација рекордс“, Влатко Стефановски покажа ненадмината техника и уникатен сензибилитет еднакво успешно во етно и рок, но и во блуз, фанк и џез жанрови, кои го обликуваа неговиот музички пат и го обележуваа како уметник.

Во текот на својата кариера, Влатко ја делеше сцената со најголемите гитаристи во светот, вклучувајќи ги Томи Емануел, Јан Акерман и Сточело Розенберг, а регионалната публика секогаш покажуваше длабока почит и интерес за неговата музика. Најновиот студиски албум „Тафталиџе шафл“, објавен под закрилата на „Кроација рекорд“, кој Влатко Стефановски ќе го претстави на претстојната турнеја, со месеци го држи врвот на продажните листи за компакт – дискови и
винили.

Публиката на концертите на Стефановски ќе има можност да слушне и дел од новиот материјал на гитаристичкиот виртуоз од светски калибар.