Во еден од најнеочекуваните, но и најемотивните моменти во историјата на изборот на песна на Евровизија, австрискиот контра-тенор JJ го освои првото место на годинешната песна на Евровизија во Базел 2025, носејќи ја Австрија по трет пат на врвот на европската музичка сцена во 69-годишна историја на натпреварот. Неговиот триумф не е само личен успех, туку претставува и културен пресек што ги предизвикува традиционалните норми во музичката индустрија.

Враќањето на JJ во Виена вчерапопладне претставуваше вистинска прослава. На аеродромот во Виена (Швехат), каде што пристигна во 16:25 часот, беше дочекан како национален херој, а потоа се упати кон седиштето на државната телевизија ОРФ, каде се одржа првата победничка конференција под силен медиумски интерес. „Ова е неверојатно. Веројатно ќе сфатам дури на смртната постела дека всушност го направив ова“, изјави JJ, признавајќи дека без поддршката на неговиот тим ќе „полудел“.

Клучот на неговиот успех лежи во уникатниот вокален стил контра-тенор, што значи дека пее во женски високи тонови, што е реткост кај машките изведувачи. „Студирав класично пеење со години, па не бев загрижен за техничките аспекти“, објасни тој, истакнувајќи дека сака да го искористи својот успех за да се бори против стигмата околу овој стил на пеење. „Задоволство ми е што на најголемата музичка сцена можев да покажам дека има луѓе како мене“, додаде тој.

Прашањето за идната улога на JJ во организирањето на Евросонг 2026 веќе се поставува. Иако шеговито одговори дека можеби ќе ја претставува Австрија повторно „за 100 години“, неговата желба е да го продолжи својот пат како соло уметник, мешајќи поп музика со класични елементи. Исто така, изрази силна желба да биде еден од домаќините на Евровизија 2026, по можност заедно со Кончита Вурст, победникот од 2014 година.

Меѓутоа, победата носи и големи предизвици за Австрија и ОРФ. Организацијата на Евровизија 2026 ќе бара значителни финансиски средства, а генералниот директор на ОРФ, Роланд Вајсман, призна дека иако победата предизвика „малку шок“, доминира радоста. „Ќе се справиме“, рече тој, истакнувајќи дека веќе се во тековни разговори со владата за финансиска поддршка. Културниот министер Андреас Баблер (СПО) ја нагласи важноста на настанот како промоција за австриската музичка сцена, потсетувајќи дека земјата веќе има искуство во организирање на „скромен“, но успешен натпревар во 2015 година.

Додека локацијата за Евровизија 2026 сe уште не е одредена, ОРФ вети транспарентен процес за изборот на местото на настанот. Се разгледуваат повеќе градови, а одлуката ќе зависи од инфраструктурните и логистичките можности.
Победата на JJ е повеќе од музички успех , тоа е потврда за разновидноста и инклузивноста на Евровизија. Неговиот пат од класичните студии до триумфот на европската сцена е инспиративен пример за сите кои се борат против предрасуди во уметноста. Австрија сега стои пред можност да го искористи овој момент за да ја зацврсти својата позиција на музичката карта на Европа, а светот со нетрпение очекува да види како ќе го организира натпреварот следната година.

Оваа победа не е само за JJ или Австрија – тоа е победа за сите кои веруваат дека музиката ги надминува границите и ги обединува луѓето.