Вилата „Олеандра“ на езерото Комо, Италија, ги отвора своите врати за ексклузивен добротворен настан. Програмата вклучува вечери, приватни тури и средби со најдискретниот пар во Холивуд – Џорџ и Амал Клуни, и сето тоа без мобилни телефони.

За оние кои сонуваат за летување како во филм, она што Џорџ и Амал Клуни го организираат на езерото Комо не е само одмор, туку ексклузивно искуство на границата помеѓу луксузот и општествената ангажираност.

Од 7 до 10 август 2025 година, 16 богати и дарежливи луѓе ќе живеат како во сон, со вечери во вилата, восхитувачки пејзажи и средби со најелегантниот и најповлечениот пар во Холивуд. Сето тоа во име на солидарноста.

Дневниот весник „Провинција ди Комо“ го најавува она што веќе сега се смета за најгламурозниот настан на летото на езерото. Престојот, за кој била потребна донација од 160.000 долари на организацијата Фондацијата Клуни за правда, е осмислена во соработка со агенцијата „Сатопија травел“ и ветува неповторлив спој на убавина, дискреција и социјална свест.

Сите приходи ќе бидат донирани во целост за иницијативи за човекови права и глобална правда.

Од приватен авион до вила со поглед на езерото каде што започнува авантурата

Учесниците ќе бидат пречекани на аеродромот во Милано и транспортирани со приватно возило до луксузната „Вила Пасалаква“, хотел со пет ѕвезди со поглед на езерото Комо, недалеку од Лаљо.

Првиот впечаток ќе биде незаборавен: пијалак за добредојде и вечера со специјалитети од локалната кујна и вина од регионот. Пејзажот ќе го направи своето, врамувајќи го искуството како разгледница надвор од времето.

Вечера во Вила Олеандра, покана што секој ја посакува

Кулминација на настанот, секако, ќе биде вечерата во вила „Олеандра“, познатата летна резиденција на семејството Клуни. Скриена меѓу зеленилото и мирните води на езерото, оваа вила ќе ги пречека гостите на ексклузивна вечера со Џорџ, Амал и можеби близнаците Ела и Александар, кои секогаш се држат подалеку од јавноста.

Средбата нема да биде само друштвена, туку ќе се зборува и за филантропијата, правдата и глобалната ангажираност, теми што се во срцето на работата на фондацијата на Клуни. Потоа ќе следи уште една гала вечера во префинетата атмосфера на „Вила Пасалаква“, со моменти на разговорот за проектите што ги поддржува фондацијата.

Тури, тајни вили и дигитална тишина

Помеѓу здравиците и средбите, ќе бидат организирани екскурзии низ историските вили на Лари, од кои некои обично се затворени за јавноста. Планирани се и излети со приватни глисери за да може од езерото да се видат архитектонските и природните убавини на оваа област.

Меѓутоа, постои едно строго правило што прави сè уште поспецијално: без мобилни телефони. На влезот во „Вила Олеандра“, секој гостин ќе мора да го остави својот телефон во кошничка. Нема фотографии, нема инстаграм-приказни, нема конекција. Оваа одлука ја донеле Џорџ и Амал за да ја заштитат приватноста, но и да создадат автентичен простор ослободен од дигитални одвлекувања на вниманието.

Тоа е филозофија што двојката ја применува во сите свои домови, од САД до Англија, и која станува составен дел од ова искуство. Во едно неодамнешно интервју, Амал ја нарече оваа практика „мал ритуал неопходен за целосно да се доживее моментот“.

Фондацијата на семејството Клуни: Елеганцијата на посветеноста

Фондацијата Клуни за правда не е само познато име на меморандум. Основана во 2016 година, оваа хуманитарна организација дејствува во деловите од светот во кои се живее во најтешки услови за да ги промовира човековите права, да ги заштити најзагрозените и да обезбеди правда таму каде што е ускратена. Ова ексклузивно искуство е еден од начините на кои фондацијата директно ги вклучува донаторите, трансформирајќи го луксузот во средство за правење добро.

Во ерата на искуствениот туризам, она што го замислиле Клуни е уникатен модел. За малкумина, секако, но богато со значење: зад гламурот лежи желбата да се обезбеди не само бегство од секојдневниот живот, туку и подлабока врска со вредностите што го водат животот на овој славен пар.

А за оние кои остануваат надвор од овој ексклузивен круг, останув шармот на приказната што ги обединува Холивуд и Италија, посветеноста и концептот на „долче вита“, со доза на елеганција што само езерото Комо и Џорџ и Амал Клуни можат да ја понудат.