Од 2 мај ќе се започне со систем за наплата на влез на моторни возила на територијата на националниот парк „Шар Планина“. Како што информираат од националниот парк на својот фејсбук-профил, влез ќе треба да платат сите посетители што влегуваат со моторни возила по дозволените патишта низ паркот, освен жителите на селата, сопствениците на приватни имоти и правни лица регистрирани на територијата на паркот.

„Со праќање на СМС порака за влез на моторното возило, Вие директно придонесувате кон заштитата на природата на Шар Планина и помагате во зачувувањето на ова уникатно природно богатство за идните генерации. Стратешките заложби на ЈУ Национален парк ‘Шар Планина’ се насочени кон тоа на посетителите кои не оставаат еколошки отпечаток да не им се наплатува влез во Националниот парк“, се вели во соопштението на НП „Шар Планина“.

За мотоцикли и автомобили надоместокот изнесува 150 денари, додека 250 денари ќе се плаќа за комбе и минибус до 20 седишта. Автобусите и тешките товарни возила ќе треба да плаќаат по 450 денари.