Основното јавно обвинителство Битола оформи предмет за одлагањето на пепелта во РЕК Битола, дали тоа се врши според прописите, согласно еколошката дозвола и дали се работи за тоскична пепел. Ова следи по реакциите во јавноста и објавените фотографии и видеа на социјалните мрежи дека во Битола и околината се шири токсична прашина од РЕК Битола.

Државниот инспекторат за животна средина(ДИЗЖС) спроведе вонреден инспекциски надзор и утврди недостатоци во однос на мерките за спречување и намалување на емисијата на пепел на одлагалиштата, поради што му наложи на РЕК Битола да ги отстрани истите и да достави резултати од извршени мерења.

„Во таа насока, надлежен ЈО издаде наредба до СВР Битола за вршење увид на лице место и утврдување факти од значење за евентуално постоење на кривично дело кое се гони по службена должност. Истовремено беше побарано да се изврши и вонреден инспекциски надзор на лице место на депонијата од страна на ДИЗЖС.

Надзорот беше извршен и беа утврдени определени недостатоци во однос на мерките за спречување и намалување на емисијата на прашина/пепел на одлагалиштето за пепел, поради што ДИЗЖС наложил на РЕК Битола да ги отстрани утврдените недостатоци и да достави резултати за извршени мерења на амбиенталниот воздух на одлагалиштето за пепел во рок од 30 дена од извршениот надзор“ соопшти битолското обвинителство.

Оттаму додаваат дека по добиените резултати и преземени мерки, ДИЗЖС ќе го извести ОЈО Битола со цел проценка на потребата и основаноста од понатамошно јавнообвинителско постапување.

При процесот на производство на електричната енергија се создава токсична и радиоактивна пепел која треба соодветно да се затрупува со земја, бидејќи при ветровито време, прашината се разнесува низ воздухот.