Вишиот јавен обвинител Мустафа Хајрулахи во изјава за телевизијата „Канал 5“ тврди дека републичкиот јавен обвинител Љупчо Коцевски директно му посочил да внимава како ќе се постапува со предметот за бонусите во Специјалното јавно обвинителство (СЈО) и да не се дава својство на оштетен на ВМРО-ДПМНЕ, која поднела жалба до Вишото обвинителство за овој случај.

Случајот се однесува на законитоста и оправданоста на бонусите кои биле исплатени на обвинителите во поранешното СЈО, во износ од над 700.000 евра.

Хајрулахи, како што вели, му одговорил на Коцевски дека тој ниту сака, ниту има надлежност да се меша во работата на предметниот обвинител Јован Цветановски.

„Неколку дена откако стигна предметот по жалба од страна на ОЈО ГОКК, РЈО Коцевски телефонски ми се јави и во разговорот што го имав со него во кабинетот ми рече дека треба да бидеме претпазливи во однос на одлуката на ВЈО во однос на поднесената жалба, односно дека не трбеа да се даде својство на оштетен за ВМРО-ДПМНЕ бидејќи тие не се оштетени. Јас на тоа одговорив дека предметот е во фаза на ЈО, кое е задолжено со истиот предмет и по проучување истиот ќе биде рефериран кај мене. Ќе видиме кој е ставот на обвинителот, а јас не можам да се мешам во работата на ЈО, вели вишиот обвинител Хајрулаи за „Канал 5“.

Предметниот обвинител Јован Цветановски, пак, вели дека за него пораката од Коцевски претставува директна закана, но тоа сепак нема да влијае врз неговата работа.

-Во врска со разговорот кој го имал Мустафа со републичкиот обвинител, тој ми е пренесен веднаш. Тоа значи за мене директна закана бидејќи годиниве не сум доживеал, ниту сум чил за таква закана – да се внимава. Предметот е сензитивен, точно е, и ќе биде проследен како и секој друг. Мојата одлука ќе биде независна, вели обвинителот Цветановски.

Коцевски за „Канал 5“ категорично ги отфрла ваквите наводи како апсолутно невистинити. Вели дека ниту во овој, ниту во било кој друг предмет, не бил вршен притисок.

„Јавниот обвинител на Република Северна Македонија ги отфрла како апсолутно невистинити тврдењата кои ги наведувате. Ниту во наведениот, ниту во кој било друг предмет во кој постапува Вишото јавно обвинителство Скопје или друго јавно обвинителство, не е вршен притисок врз одлучувањето на надлежните јавни обвинители од страна на Јавниот обвинител на Република Северна Македонија“, реагираше попладнево ОЈО.