Џејмс О’Брајaн, помошникот државниот секретар за европски и евроазиски прашања на САД, не знае ништо за нон-пејпер, односно неформален документ, зад кој треба да застанат сите партии на Албанците, а кој предвидува ниту една партија да не прифати учество во новата влада ако македонската партија, победничка на изборите, не гарантира дека во рок од шест месеци ќе го смени Уставот. О’Брајaн порача за нон-пејперот граѓаните да ја прашаат партијата која е против измена на Уставот и да одлучат помеѓу визијата што ја знаат и тоа што се дава како ветување.

– Ни беше кажано дека некој ќе нè праша за таков нон пејпер. Не знам ништо за тоа. Останувам на тоа што го кажав во ноември и на тоа што го кажав денес. Сметаме дека зависи од граѓаните на Северна Македонија да решаваат за патот понатаму. Сметам дека една партија предлага пат напред и прифаќа критики, зашто на некои луѓе им се допаѓа или не им се допаѓа таа насока. Друга партија ветува дека ќе смисли начин со кој што ќе се придвижат напред. Мислам дека првично е граѓаните да ја прашаат таа партија за овој нон-пејпер и тие да одлучат помеѓу визијата што ја знаат и тоа што се дава како ветување – рече О’Брајaн.

Висок владин функционер за „Слободен печат“ брифира дека нема потреба од неформален документ со кој партиите на Албанците, и од власта и од опозицијата, ќе се обврзат дека нема да влезат во влада ако нема гаранции за уставните измени.

– Лидерите на партиите на Албанците нема да потпишат нон-пејпер. Но, 1.000 отсто бидете сигурни дека ниту една партија на Албанците нема да биде дел од владата ако не се смени Уставот. Уште повеќе, договорено е партиите на Албанците кои ќе учествуваат на изборите да инсистираат прво да се смени Уставот, а потоа да се формира Владата. Значи, или уставни измени или нема влада – вели функционерот за „Слободен печат“.

СДСМ и ВМРО-ДПМНЕ и натаму тактизираат со изборот на техничката влада

Претседателот на Собранието и иден мандатар, Талат Џафери, пак, одбива да коментира политички изјави.

– Во однос на вчерашните изјави на политичките партии, претседателот Џафери не коментира партиски изјави – велат од кабинетот на Џафери и додаваат дека роковникот за активностите во Собранието останува непроменет.

Владејачките СДСМ и ВМРО-ДПМНЕ пак, и натаму тактизираат со изборот на техничката влада, иако влегоа во клучната недела. И премиерот и лидер на СДСМ Димитар Ковачевски и лидерот на ВМРО-ДПМНЕ, Христијан Мицкоски, очекуваат другиот да попушти од позициите за техничката влада, која Собранието треба да ја избере в недела. ВМРО-ДПМНЕ ќе номинира министри и дополнителни заменици министри во техничката влада, но нема да ја гласа, додека власта останува на позицијата дека ако опозицијата партиципира во пржинската влада, треба и да ја гласа, во спротивно мандатарот Џафери ќе предложи владин кабинет со празни места за кандидатите на ВМРО-ДПМНЕ.

– Техничката влада е законска обврска и сите што учествуваат во техничката влада, тоа се партиите и од власта и од опозицијата, треба прво да ги предложат своите кандидати и, второ, да ја поддржат владата во Парламентот. Сметам дека има доволно денови до недела тие формалности да се завршат и в недела да имаме гласање со кое ќе добиеме техничка влада која ќе ги спроведе изборите. Секој треба да работи во согласност со закон и со демократските принципи. Предлагате министри и нормално е да ги поддржите тие министри, бидејќи не можете да очекувате да предложите министри и некој друг да ги поддржува вашите министри. Сметам дека има доволно денови за тоа да се направи до недела – изјави Ковачевски.

Тој ги демантира шпекулациите дека ќе биде министер во техничката влада. Ковачевски рече дека ќе ја предводам кампањата на СДСМ и коалицијата за претстојните иизбори.

За координаторот на пратеничката група на ВМРО-ДПМНЕ, Никола Мицевски, изјавите на Ковачевски се политички аматеризам и дилентатизам, бидејќи Уставот и законите се прецизни и јасни.

– Јасен е Законот за влада, во член 3 се вели дека мандатарот предлага министри за секое од министерствата утврдени со закон и министри без ресор. Тука ставаме точка, и тоа треба да го испочитува мандатарот. Од кандидатот за мандатар уште немаме слушнато изјава за ова, но можеме да ги насочиме да го погледнат членот 3 од Законот за влада. Оставката на претседателот на Владата повлекува оставка на целата Влада. Датумите кои ги соопштуваат како можни датуми за оставка, предлог за половична влада е аматеризам. Со оставката на премиерот, во оставка е целата Влада и ќе нема немаме министри кои ќе ги потпишуваат платите, на пример. Не може да има дополнителни министри или заменици министри ако нема министри. Се друго е надвор од Уставот – вели Мицевски.

И според Мицевски, има време да ги предложат своите кадри во техничката влада. Тој повтори дека до крајот на неделава ВМРО-ДПМНЕ ќе предложи свои кандидати за сите отворени места. Мицевски најави дека за утре е закажан состанок на Извршниот комитет на партијата, но ќе видат како ќе се одвиваат работите.

Рангеловиќ: Политички коректно е да гласате ако веќе предлагате министри

За рашомонијадата со изборот на техничката влада, политикологот Иво Рангеловиќ вели дека

гласањето на техничката влада е обврска на владиното мнозинство, но не и на опозицијата.

– Сепак, политички коректно е доколку како опозиција нудите министерски кандидати во техничката влада, истата и да ја поддржите, или целосно да ја бојкотирате без да имате свои функционери. Премногу тежина се дава на влада која би била, пред се, техничка, а не политичка, чија цел е спроведување услови за фер и демократски избори и трае само 100 дена. Потенцијалното неучество на опозицијата во техничката влада е легитимна стратегија само доколку не се оспорат изборните резултати токму од опозицијата, бидејќи во тој случај истата не учествувала во создавање на предуслови за фер избори – смета Рангеловиќ.

Според собраниски извори, оставките на премиерот Димитар Ковачевски и на претседателот на Собранието Џафери би требало да се случат на 25 јануари, а на 26 јанури Собранието треба да ги констатира оставките и да го избере новиот претседател на Собранието Јован Митрески. Изборот на техничката влада треба да биде в недела, на 28 јануари. Истиот ден на нова седница треба да бидат избрани замениците министри и дополнителните заменици министри.

Техничката влада се формира 100 дена пред одржување на парламентарните избори, што треба да се одржат на 8 мај. Претходно, на 24 април ќе се одржат претседателските избори. Мандатот на оваа влада завршува со изборот на новата влада.