Руски пилот се обидел да собори авион за надзор на Кралските воздухопловни сили (РАФ), откако верувал дека имал дозвола да пука, дознава Би-Би-Си.

Пилотот истрелал два проектила, од кои првиот промашил, иако првично се тврдело дека станува збор за грешка при истрелувањето. Русија тврдела дека инцидентот минатиот септември бил предизвикан од „техничка неисправност“. Министерството за одбрана на Велика Британија тогаш јавно го прифати руското објаснување.

Но, сега три високи западни одбранбени извори со знаење за инцидентот изјавиче за Би-Би-Си дека руските комуникации пресретнати од авионот РАФ РЦ-135 Ривет Џоинт дале многу поинаков извештај од официјалната верзија.

Авионот на РАФ – со екипаж до 30 луѓе – летал во мисија за набљудување над Црното Море во меѓународниот воздушен простор на 29 септември минатата година кога наишол на два руски борбени авиони СУ-27.

Пресретнатата комуникација покажала дека еден од руските пилоти мислел дека добил дозвола да го гаѓа британскиот авион, по не доволно јасна команда од руска копнена станица. Меѓутоа, вториот руски пилот не го сторил тоа. Ривет Џоинт бил натоварен со сензори за пресретнување на комуникациите. Екипажот на РАФ го слушнал инцидентот што можел да резултира со нивна смрт. Британското министерство за одбрана реши дека нема да ги објави деталите за тие комуникации.

Одговарајќи на овие нови откритија, портпаролот на британското министерство објави: „Нашата намера отсекогаш била да ја заштитиме безбедноста на нашите операции, да избегнеме непотребна ескалација и да ја информираме јавноста и меѓународната заедница“.

Што навистина се случило

Додека двата руски СУ-27 се приближувале до шпионскиот авион РАФ, тие добиле комуникација од контролорот на нивната копнена станица. Еден западен извор изјавил за Би-Би-Си дека зборовите што ги добиле биле нешто слични на „ти ја имаш целта“.

Овој двосмислен јазик еден од руските пилоти го разбрал како дозвола за пукање. Се чини дека недоразбирањето покажало висок степен на непрофесионализам од страна на инволвираните, велат изворите. Спротивно на тоа, пилотите на НАТО користат многу прецизен јазик кога бараат и добиваат дозвола за пукање.

Рускиот пилот истрелал проектил, но не успеал да се заклучи на својата цел, велат за Би-Би-Си. Тоа било промашување, а не дефект. Извори за Би-Би-Си велат дека потоа избило кавга меѓу двајцата руски пилоти. Пилотот на вториот СУ-27 не мислел дека добиле дозвола да пукаат.

И покрај кавгата, првиот пилот сепак истрелал уште еден проектил. Би-Би-Си пишува дека вториот проектил едноставно паднал од крилото – што укажува на тоа дека оружјето или не функционирало или дека лансирањето било прекинато.

Три недели подоцна, владата на Обединетото Кралство потврди дека инцидентот се случил – по објаснувањето од руското Министерство за одбрана, кое го нарекло „техничка неисправност“.

Во изјавата за пратениците на 20 октомври, тогашниот секретар за одбрана Бен Валас го нарекол инцидентот „потенцијално опасен ангажман“.

Но, тој го прифатил руското објаснување, велејќи: „Ние не сметаме дека овој инцидент претставува намерна ескалација од страна на Русите, а нашата анализа се согласува дека тоа се должи на дефект“.