Американскиот предлог за завршување на војната во Газа ги охрабрува Палестинците да останат во Појасот и предвидува создавање пат кон идната палестинска држава, според копија од планот добиена од „Тајмс оф Израел“.

Документот со 21 точка, кој САД оваа недела го споделија со неколку арапски и муслимански земји на маргините на Генералното собрание на ОН, содржи клаузули што веќе се појавуваа во други предлози – од ослободување на сите заложници до отстранување на Хамас од власт, објави „Тајмс оф Израел“.

Одлуката експлицитно да се охрабрат Палестинците да останат во Газа претставува значаен пресврт за администрацијата на Трамп, со оглед на тоа што во февруари тој ја шокираше јавноста со идеја дека САД би можеле да ја преземат Газа и трајно да ја преселат нејзината популација од два милиони луѓе.

Овие изјави им дадоа поттик на радикалните партнери на премиерот Бенјамин Нетанјаху и на дел од умерените политичари во Израел, кои активно работеа да ја поттикнат „доброволната миграција“ на Газанците, но без успех.

Владата на Словенија го прогласи Нетанјаху за персона нон грата

Трамп отстапува од својата досегашна реторика

Покрај тоа, вклучувањето на можност за идно создавање палестинска држава, по реконструкцијата на Газа и по реформата на Палестинската самоуправа, исто така, претставува отстапување од досегашната политика на Трамп, кој избегнуваше да даде поддршка на решението со две држави.

Планот, потврден од два извора запознаени со содржината, предвидува и отворање дијалог меѓу САД, Израел и Палестинците за постигнување „политички хоризонт“ за „мирна коегзистенција“.

Иако овие услови се привлечни за Палестинците, документот, составен од специјалниот американски пратеник Стив Виткоф, вклучува и барања што Израел одамна ги истакнува: разоружување на Хамас, демилитаризација на Газа и процес на дерадикализација на населението.

Можниот пат кон палестинска држава е црвена линија за премиерот Нетанјаху, кој во ОН изјави дека тоа би било „лудило“ и дека Израел нема да прифати создавање „терористичка држава на еден километар од Ерусалим“.

Владата на Словенија го прогласи Нетанјаху за персона нон грата

Сепак, претседателот Доналд Трамп изрази оптимизам, тврдејќи дека преговорите се во тек веќе четири дена и дека ќе продолжат додека не се постигне договор. Тој нагласи дека сите земји од регионот се вклучени, дека Хамас е информиран и дека Нетанјаху е запознаен на сите нивоа.

Планот сè уште е општ и недетализиран, па ќе бидат потребни дополнителни преговори, дури и ако страните формално се согласат со него.

Вака изгледа планот во 21 точка

1. Газа ќе биде дерадикализирана зона без тероризам.
2. Газа ќе биде реконструирана за добробит на својот народ.
3. Ако двете страни се согласат, војната веднаш ќе заврши, а Израел постепено ќе се повлече.
4. За 48 часа по прифаќањето, сите заложници (живи и починати) ќе бидат вратени.
5. Израел ќе ослободи стотици палестински затвореници и ќе ги врати телата на загинатите.
6. Членовите на Хамас, кои ќе прифатат мир, ќе добијат амнестија, а оние кои сакаат да заминат ќе добијат безбеден излез.
7. Хуманитарната помош ќе влезе со најмалку 600 камиони дневно, заедно со обнова на инфраструктура.
8. Помошта ќе ја распределуваат ОН, Црвениот полумесец и други меѓународни организации.
9. Газа ќе ја води привремена влада од палестински технократи, надгледувана од ново меѓународно тело предводено од САД.
10. Ќе се создаде економски план за реконструкција и инвестиции.
11. Ќе се воспостави економска зона со намалени тарифи.
12. Никој нема присилно да биде иселен; Газанците ќе бидат охрабрени да останат и да ја градат својата иднина таму.
13. Хамас нема да има улога во управувањето; сите тунели и воени структури ќе се уништат.
14. Регионалните партнери ќе гарантираат безбедност и усогласеност.
15. Ќе се формира меѓународна сила за стабилизација, која ќе обучи палестинска полиција.
16. Израел нема да ја окупира ниту анектира Газа; ќе предава територии постепено.
17. Ако Хамас одбие, планот ќе се спроведува во „зони без терор“.
18. Израел нема да изведува идни напади во Катар, признавајќи ја неговата медијаторска улога.
19. Ќе се воспостави процес на дерадикализација преку меѓурелигиски дијалог.
20. По реконструкцијата на Газа и реформата на ПА, ќе се отвори пат кон палестинска држава.
21. САД ќе воспостават дијалог меѓу Израел и Палестинците за политичка иднина и за мирна коегзистенција.

Дали се ближи крајот на војната?

Трамп во петокот изјави дека е блиску до договор за завршување на војната во Газа и за враќање на заложниците.

– Изгледа дека имаме договор за Газа. Мислам дека е договор што ќе ги врати заложниците, тоа ќе биде договор што ќе стави крај на војната – им рече Трамп на репортерите пред да замине од Белата куќа за да присуствува на голф-турнир во Њујорк.

Тој не даде дополнителни детали.

Трамп, кој останува најтврд сојузник на Израел на светската сцена, рече дека во четвртокот разговарал со претставници од неколку блискоисточни земји, како и со израелскиот премиер Бенјамин Нетанјаху.