Светската програма за храна (WFP) на Обединетите нации денес објави дека околу 50 проценти од побараната хуманитарна помош стигнала во Појасот Газа.

Според проценките на Светската програма за храна, речиси 470.000 луѓе се прегладнети, вклучувајќи околу 90.000 жени и деца на кои им е неопходна специјализирана нутритивна поддршка, пренесува Ројтерс.

Во најновата анализа, Интегрираната проценка на безбедноста на храната (IPC) предупредува дека во регионот се развива најлошото можно сценарио – состојба на масовен глад. Од таму апелираат за итно запирање на непријателствата и обезбедување непречен, обемен и континуиран хуманитарен пристап.

„Ова е единствениот начин да се спречат дополнителни смртни случаи и катастрофално човечко страдање,“ се наведува во извештајот на IPC.

IPC работи во соработка со влади, агенции на Обединетите нации и меѓународни хуманитарни организации, и ја користи унифицираната методологија за проценка на степенот на кризни ситуации поврзани со храна.

Хуманитарните организации повторно повикуваат на итен глобален одговор, пред состојбата во Газа да прерасне во хуманитарна катастрофа со несогледливи последици.