Во тек се божиќните пости и многу верници христијани се приклучуваат на овој пост, но понекогаш луѓето немаат идеи за тоа како да ја комбинираат растителната храна, па честопати исхраната за време на постот е монотона, а исто така и не е соодветно балансирана за да обезбеди доволни количини масти, протеини и јаглехидрати.

Затоа, ви донесуваме неколку значајни совети од нутриционистката Маја Велковска од Диет клуб Нутрика, кои ќе ви помогнат во периодот на пост да се храните здраво и соодветно.

– Фокусирајте се на здрава храна. Постојат многу посни намирници што се високо процесирани и содржат различни адитиви и додатоци. На пример, и самиот чипс е посен, но не можеме да кажеме дека е и дефиниција за „здрава храна“. Ако сакате да се храните здраво при постењето, тогаш треба да се фокусирате на домашно подготвени оброци, направени од квалитетни и нутритивни состојки, а целата преработена храна да се исклучи од исхраната, или барем да се употребува во минимални количини, т. е. да не ви биде основна храна во текот на вашиот пост.

– Не поминувајте ден без добар извор на растителни протеини. Растителните производи содржат протеини, и да, возможно е дури и со посна исхрана да внесувате доволно протеини, доколку консумирате намирници што се добар извор на овие макронутриенти. Па, така, внимавајте на тоа следните намирници да бидат редовно застапени во вашата исхрана при постот: мешунки (грав, леќа, наут, соја…), јатки и семки (ореви, лешници, бадеми, ленено семе, сончоглед, семки од тиква…), тофу и други соини производи, некои житарки како киноа, пченица итн.

– Во деновите на строг пост, кога не треба да додавате масло во оброците и во салатите, можете да додадете семки и јатки како дополнителен извор на природни и здрави масти. Или, пак, можете да си подготвите некој сос од семки и јатки, без масло, кој ќе го додадете во салатата или ќе го комбинирате со главниот оброк како додаток.

– Во деновите во кои е дозволена риба, почесто избирајте свежа речна риба, наместо конзервирана. Најдобро е рибата да се подготви на пареа или да се испече во рерна или на скара, на пониска температура.

– Креирајте си нови оброци и принајдете нови рецепти за посни оброци, со цел исхраната да ви биде побогата и разновидна. Можете да си подготвите хранливи и вкусни пудинзи од овошја и житарки, со додаток на путери од јатки, кои ќе бидат вкусен, здрав и нутритивен десерт, или дури и оброк. Зеленчуците и семињата, пак, можете да ги искористите за подготовка на здрави намази. Исто така, може да подготвите и интегрални крекери од интегрални брашна и семиња итн.

– Внесувајте доволно свежо овошје и зеленчук во текот на постот, бидејќи свежите овошја и зеленчуци се одличен извор на витамини, минерали и фитонутриенти, а притоа не содржат многу калории.

Следете ги советите на Маја на инстаграм – профилот:  the_healthier_you_ и блогот thehealthieryou.mk.