По големиот велигденски пост, христијанските верници претпочитаат богата велигденска трпеза на која има прилично калорична храна. Со оглед на тоа што сите се опуштени и не внимаваат на квантитетот на храната, таа неумереност мора да се избалансира со здрава храна во постпразничниот период.

Поради таа причина, решивме да поразговараме со нутриционистката Маја Велковска, која има неколку совети коишто ќе ви помогнат да го неутрализирате прејадувањето за време на празниците.

„Најдобрата опција, секако, е да се обидеме да бидеме разумни и умерени во нашата исхрана, дури и во текот на празниците, но ако тоа сепак не е нашиот прв избор, тогаш дефинитивно треба да се обрне поголемо внимание на нашата исхрана после неумереното јадење“ – вели нутриционистката Маја Велковска.

1. Ако за време на празниците сте јаделе поголема количина на храна, т.е. сте внесувале повеќе калории отколку што ви се потребни, тогаш во следниот период треба да внесувате помалку храна. Не препорачувам прејадување, па гладување, но треба да имате на ум дека вишокот што сте го изеле за време на празниците, ќе треба да го потрошите (зголемена физичка активност) или да го неутрализирате преку намален калориски внес (т.е. да јадете помали количини на храна, неколку дена по празниците). Можете да јадете помали оброци, или можете да прескокнете некој оброк, што секако е ваш личен избор.

2. Фокусирајте се на нутритивни намирници кои не содржат многу калории. Секако, тука спаѓа свежото овошје и зеленчук, цели зрна житарки и производи од нив, мешунки, домашни супи и чорби. А со оглед на тоа што веројатно во претходниот период сте изеле доста храна од животинско потекло, можете во овој период да ја сведете на минимум храната од животинско потекло и малку повеќе да се ориентирате на нутритивни, нискокалорични, а здрави растителни опции.

3. Внесувајте доволно вода, и растителни влакна. Водата ви е неопходна за добра хидратација на организмот и за сè да може правилно да функционира, циркулира и да се доставува до сите клетки и ткива во телото. Растителните влакна се наоѓаат во житарките, овошјето, зеленчукот, мешунките, семките и јатките, и тие ќе ви помогнат да се апсорбира и да се исфрли од телото, дел од холестеролот кој се внесува преку храната, а тоа ви е навистина потребно, после период во кој сте внесувале повеќе храна од животинско потекло, а со самото тоа и холестерол.

4. Масните слатки, кои содржат и многу шеќер, а кои се задожителен дел од секоја празнична трпеза, заменете ги со свежо овошје.

5. И најважниот совет е дека здравиот начин на исхрана треба да ви биде стил на живеење, а не нешто за што треба да вложувате посебни напори за да го постигнете. Повремени „отстапувања“, празници итн. не се проблем, сѐ додека нутритивните, здрави и избалансирани оброци се неизбежен дел од вашето нормално секојдневие.