Новото движење на Изет Меџити кое ќе дејствува опозициски можно е да биде тригерот за предвремени парламентарни избори, особено ако на власта не ѝ успее да обезбеди двотретинско мнозинство за уставните измени. Иницијатор на предвремените избори може да биде лидерот на ДУИ, Али Ахмети.

Мали се шансите лидерот на ВМРО-ДПМНЕ Христијан Мицкоски повторно да се впушти во составување мнозинство во Собранието, особено по епизодата со пратеникот Кастриот Реџепи. Но, сега новото движење во кое се приклучи и Реџепи може да го испровоцира лидерот на ДУИ Али Ахмети да иницира предвремени избори, брифираат за „Слободен печат“ извори и од власта и од опозицијата.

По официјализирањето на новото движење, тројца пратеници – Меџити, Мерита Коџаџику и Кастриот Реџепи – преминаа во опозиција. Од ВМРО-ДПМНЕ велат дека опозицијата секогаш е за предвремени избори, но дека сега повеќе се концентрирани на теренската работа, на пишување на предизборната програма отколку да влезат во авантура за преземање на мнозинството во парламентот, бидејќи и онака изборите, предвремени или редовни, за брзо време ќе се случат. Официјалната порака од партијата е дека очекува сите 120 пратеници да гласаат за распуштање на Собранието и да се оди на предвремени парламентарни избори.

Пратеникот Кастриот Реџепи, кој пред една и пол година исчезна од Собранието кога опозицијата предводена од ВМРО-ДПМНЕ требаше да го преземе мнозинството, сега за „Слободен печат“ вели дека ја менува страната и ако тогаш ја спаси владата на Заев, сега ќе дејствува опозициски.

– Деновиве со допис ќе го информираме претседателот на Собранието Талат Џафери дека јас, Меџити и Коџаџику ќе дејствуваме опозициски како независни пратеници. Приоритет ни е формирање група со пратеници од Беса и од Алтернатива. Битно е и да почне процесот на уставните измени, бидејќи не можам да бидам против моите принципи. Како опозиција, пак, ќе се стремиме што побрзо да дојдеме до предвремени парламентарни избори – вели Реџепи.

Откако пропадна обидот опозицијата да го преземе мнозинството бидејќи Реџепи беше „киднапиран“, тој тогаш како проевропски настроен го правдаше опстанокот на Владата на Заев убеден дека во декември 2021 година ќе добиеме датум за преговори со ЕУ.

Сега, пак, по формирањето на новото движење предводено од Меџити, поверојатно е предвремени избори да предизвика ДУИ. Според информациите, ако пропаднат уставните измени, на ДУИ повеќе ќе ѝ одговара да не ги чека редовните избори и да го пресретне Меџити во етаблирање на новото движење за да ја ублажи загубата на гласови што би се слеале на контото на новиот политички субјект. Меџити веќе најави дека целта на движењето е силен опозициски фронт, заедно со Беса и со Алтернатива, за уривање на ДУИ.

За пратеникот од Беса Фадил Зендели позиционирањето на Меџити, на Коџаџику и на Реџепи е потврда дека парламентарното мнозинство има проблем.

– Проблемот на мнозинството продолжува и по крпеницата што настана со влегувањето на Алијанса за Албанците во Владата. Се гледа дека проблемите не се решаваат бидејќи понекогаш се круцијални, посуштински. Старо-новата група, која ќе дејствуваат како движење е добра вест за политичкиот плурализам, за албанската опозиција и за наредните избори. Направивме соработка со Алтернатива и вклучувањето на движењето ќе биде значајно бидејќи ќе биде окрупнување на албанската опозиција – смета Зендели.

Пратеникот на ДУИ Арбер Адеми оцени дека одвојувањето на Меџити не е удар за ДУИ. Тој жали што од медиумите се информирале дека двајца пратеници од ДУИ се определиле за друг пат.

– Тие имале високи партиски функции и институционална одговорност. За причините за нивното самоотстранување треба да ги прашаме нив. Во мнозинството не се менува ништо. Оваа Влада и програма беа изгласани без овие пратеници. На истите бројки сме и сега, само изразуваме жалење за тоа што се случува – рече Адеми на брифинг со новинарите.

Попладнево, пак, според висок владин функционер, се очекуваше Владата конечно да ги усвои уставните амандмани подготвени од работната група при Министерството за правда. Доколку одлуката за уставните амандмани со кои Бугарите и други заедници ќе станат дел од Преамбулата денеска бидат испратени во Собранието, спикерот Талат Џафери идната недела ќе ја закаже уставната комисија.

Ако амандманите утре влезат во Собрание, пленарната седница за потребата од отворање на Уставот Џафери ќе ја закаже за 19 август, односно најмалку 30 дена откако материјалите за уставните амандмани ќе влезат во собраниска процедура. Комисиската расправа ќе почне идната недела, најверојатно в понеделник. Според собранискиот Деловник, расправата трае најмногу 10 работни дена. Можеби тоа ќе биде предолго со оглед на резолутниот став на најголемата опозициска партија ВМРО-ДПМНЕ дека не ги поддржува уставните измени. Сепак, ако комисиската расправа да трае 10 дена, дебатата за потребата од уставни измени може да трае до половината на август, бидејќи на 26 јули Собранието има активности за одбележување на скопскиот земјотрес, а на 2 август се прославува Денот на Републиката.

Работната група на 26 мај го усвои предлогот за промена на Уставот, според кој, освен бугарскиот, во Преамбулата треба да влезат и хрватскиот, црногорскиот, словенечкиот, еврејскиот и египќанскиот народ.