Новогодишно-божиќната кошничка ќе ги содржи речиси истите производи како и ноемвриската, со извесни модификации, а нејзиното траење ќе биде ограничено само на празничните периоди, дознава „Слободен печат“ од извори од трговијата. Дел од дистрибутерите со кои разговаравме, брифираат дека освен основните прехранбени производи, со намалени цени за 10 отсто, граѓаните ќе може да се почестат со поевтино месо и сувомесни производи, јужно овошје, како одреден вид стограмски млечни чоколади?!

Во кошничката како и претходно, нема да влезат алкохолните пијалаци, пивото, чоколадите што содржат јаткасти производи, апетисаните, но и тортите и колачите, бидејќи се сметаат за луксузна стока. Трговците брифираат дека сè уште не се знае дали и новогодишните пакетчиња ќе бидат дел од празничната потрошувачка набавка.

Премиерот Христијан Мицкоски пред неколку денови соопшти дека Владата веќе ја скроила новогодишната кошничка со дефиниран список со производи и цени, но не откри други детали. Тој само најави дека во пресрет на зимата ќе стартува новата кошничка, со која, како што истакна, граѓаните повторно ќе ги почувствуваат ефектите како што беше со есенската. Од Министерството за економија и труд за нашиот весник, велат дека подготовката на кошничката е во финална фаза, во тек се средбите со трговците и дистрибутерите, а производите што ќе влезат во неа се оние што најмногу поскапуваат за време на празниците.

– Подготовката на новогодишната кошничка е во финална фаза – ни одговорија од МЕТ.

До новогодишните и божиќните празници има уште многу време, но граѓаните веќе знаат што ќе подготват. Некои од неизбежните артикли што секоја година се наоѓаат на празничните трпези се печеното месо и руската салата. Сепак, иако прехранбените артикли се исти како лани, сумата што треба да се одвои за омилената празнична храна е поголема од лани.

Во месарниците веќе има понуда на прасечко и јагнешко месо, кои чинат 399, односно 599 денари за килограм. Месарите велат дека ова се само промотивни цени, а дали ќе има нови зголемувања ќе зависи од фактот дали овие видови месо ќе влеат во новата кошничка.

Есенската кошничка заврши на 31 октомври и таа содржеше 73 производи, со намалена бруто-профитна маржа за 10 отсто. Од Владата им објавија војна на поскапувањата со есенска, предновогодишна, рамазанска и велигденска кошничка, во кои ќе има своевиден избор на производи што се најупотребувани во тие периоди од годината. Но, граѓаните речиси и не видоа некој поголем ќар од претходната мерка.

Од СДСМ, бараат Владата да се откаже од новогодишната кошница. Наместо мерки што не дадоа никаков ефект и не ги намалија цените на производите, односно ги намалија само 0,1 отсто, бараат власта до го прифати нивниот предлог за храна без ДДВ. Според нив, ваквото решение ќе го подобри животниот стандард на граѓаните и месечно ќе им заштеди до 2.000 денари.

– Но, наместо да се откаже од нови погрешни мерки, го слушаме премиерот Мицкоски како најавува нова кошничка. Овој пат новогодишна, која ќе ги намали цените пак за 0,1 отсто. Ова е крајно навредувачки и потценувачки за граѓаните – изјави Јованка Тренчевска од СДСМ.

Цените на новогодишните пакетчиња и до 1.400 денари

Трговците почнаа да нудат и новогодишни пакетчиња, со грамажа што се движи од 350 грама до 3 килограми, полни со разни слатки за децата, а цените во зависност од брендот се движат од 360 до 1.400 денари. Убавите новогодишни кутии со декоративни украси, вино, чоколади и апетисани и кои најчесто ги избираат деловните луѓе, чинат до 2.500 денари.
Незаобиколна декорација за новогодишните празници се елките, а низ дуќаните веќе се нудат разни големини, но и разни цени.

Најевтините се оние најмалите и тие чинат од 440 до 900 денари, а за поголемите и пораскошните треба да се издвојат и над 20.000 денари. Средно високите цени се меѓу 2.500 и 5.000 денари. Светилките, лампионите и другите декорации се екстра и за нив треба приближно да се издвои истата сума како и за една елка.