Закани за поставени експлозивни направи утрово во 8:55 часот добија неколку спортски институции. На мета ова утро е седиштето на Фудбалската Федерација на Македонија,  Националната Арена „Тодор Проески“, Спортскиот центар „Борис Трајковски“, како и скопските клубови Вардар и Работнички.

ФФМ потврди дека се таргетирани и вработените се веднаш евакуирани од куќата на фудбалот, а антитерористичките единици на МВР ги вршат проверките во објектот.

„Слободен печат“ дознава дека утрово дојава има и на Меѓународниот аеродром Скопје поради што, додека трае евакуацијата и проверките од полицијата, откажани се сите летови, што пак предизвикува хаос во авионскиот сообраќај и големи економски последици.

Дојава за поставена бомба добил и хотелот „Александар Палас“ во кој денеска во 10 часот беше најавено отворање на конференција во организација на Советот за унапредување на високото образование и стратешки истражувања во рамки на Стопанска комора на Северна Македонија на која треба да се обратат премиерот Димитар Ковачевски и министрите за економија и за финансии Крешник Бектеши и Фатмир Бесими. Гостите и персоналот од овој хотел веќе се евакуирани, во тек е антитерористичка проверка.