Две лица се фатени на дело додека со бонсек се обидувале да исечат дел од оградата пред влезот на новата градинка во Бутел 1. Од Општина Бутел прашуваат каков е тој порив што некого го тера да оштетува детска градинка и се сомневаат дека станува збор за истите лица кои пред неколку месеци ја вандализираа оваа градинка.

Можно е да станува збор за истите лица кои нанесоа голема штета на истата градинка пред извесен период. Полицијата работи на расветлување на случајот -велат од Бутел.

Оттаму апелираат до граѓаните да се чува она што се гради и да не се уништуваме тоа што треба да се остави на децата.

Во април годинава, новоизградената градинка, уште пред да биде отворена беше вандализирана.

Градоначалникот Дарко Костовски, споделувајќи на социјалните мрежи фотографии од направените оштетувања, соопшти дека полицијата веќе има осомничени и дека очекува остра и брза акција, како и одговорност и кривични пријави согласно закон.

Направена е голема штета во новата градинка во Бутел 1, која е во план да се пушти во употреба во месец септември 2025 година. Особено е осетливо тоа што станува збор за градинка, таму каде што треба да бидат згрижени нашите најмили. Општина Бутел доживува ренесансен период, се гради како никогаш до сега ! Од таму апелирам, не да уништуваме, туку напротив, да го чуваме тоа што го градиме макотрпно со нашите заеднички пари. Искрено се надевам дека позади овој случај нема политика! – рече тогаш Костовски, истакнувајќи дека во општината се градат две нови детски градинки.