ЈП „Паркинзи на Општина Центар“ од 1 октомври 2022 година, воведува промени во зонската поделба на јавните паркиралишта, како и промени во дел од цените и надоместоците за услугите на претпријатието.

Реорганизацијата на зоните доаѓа по бројните реакции од корисниците за досегашната Зона 01, која причинуваше забуна при испраќање на смс пораките. Следствено на тоа, јавните паркиралишта на ЈП Паркинзи на Општина Центар ќе се класифицираат во три паркинг зони: Зона 0, Зона 1 и Зона 2 – велат од ПОЦ.

Во Зона 0 остануваат сите сервисни и станбени улици како и до сега: Осма ударна бригада, Лермонтова, Никола Кљусев, Максим Горки, Наум Наумовски Борче (делот пред раскрсницата помеѓу булеварите ВМРО и Партизански Одреди), Скопска и Орце Николов (од булевар ВМРО до Плоштад Македонија). Во оваа зона паркирањето ќе чини 100 денари за час.

Во Зона 1, како што информираат од ПОЦ се опфатени сервисните и станбени улици во секторите Дебар Маало, Парк и Буњаковец, а во Зона 2 во секторите Капиштец и Пролет. Паркирање на возилото во Зона 1 ќе чини 70 денари, а 60 денари од час треба да се плати во Зона 2.

Од ПОЦ велат дека со овие промени ќе се добие подобра организација на паркиралиштата и ќе се воведе поголем степен на контрола и ред во паркирањето на територија на општината.

За подобро информирање на граѓаните за промените во зонската поделба, ЈП ПОЦ ќе ги обнови сите информативни табли, што значително ќе им го олесни користењето на услугите на корисниците на паркиралиштата со кои стопанисува претпријатието и ќе им овозможи попрегледно и пофункционално паркирање во Општина Центар. ЈП „Паркинзи на Општина Центар“, исто така, направи измени и во Ценовникот на услуги и надоместоци на јавните паркиралишта и Ценовникот на услуги и надоместоци за отстранување и преместување. Новите ценовници се јавно објавени на веб страната на претпријатието www.poc.mk – информираат од јавното претпријатие.

Новите промени беа изгласани на 13-та седница на Советот на Општина Центар.