Опозицискиот СДСМ и владејачката ВМРО-ДПМНЕ и викендов продолжија со серијата обвинувања за бегството на Блерим Рамадани во Косово.

Според СДМ, власта е фатена жива во мега скандал со злоупотреба на државната граница, државните институции и серија прекршувања на законите и дека се докажало дека не станува збор за бегство на Блерим Рамадани, туку организирано ослободување и пренесување на Косово од страна на високи функционери на МВР и други институции.

-ОЈО не смее да молчи и мора итно да соопшти дека започнува истрага. Доколку ОЈО ова не го направи во најкус рок, ќе сметаме дека застанува на страна на МВР и го прикрива овој скандал. Што чека ОЈО, треба веднаш да реагира и за тоа да ја информира јавноста. Прашуваме, дали се штитат нарачателите на оваа партиско-полициска операција? Христијан Мицкоски вчера во скандалозна изјава, наместо да побара одговорност и внатрешна истрага за случајот, тој тврдеше дека СДСМ шири лаги. Го прашуваме, како Мицкоски без истрага и без ниедна информација од МВР за тоа како избегал Рамадани, тврди дека СДСМ лаже – праша Богданка Кузеска, портпаролка на СДСМ.

Според СДСМ, ова не значи ништо друго освен очаен обид на премиерот да го забошоти случајот.

-Сите индиции укажуваат дека реализацијата на оваа партиско полициска шема за пуштање на Рамадани на Косово е политички договор кој Мицкоски морал да го исполни. Доколку не се спроведе целосна, темелна и независна истрага, ќе биде јасно дека и власта и обвинителството решиле да го штитат МВР и Тошковски од одговорност, да ги штитат сите останати инволвирани во овој случај, сосе нарачателите и наредбодавачите. – рече Кузеска.

Таа повтори дека министерот Тошковски треба да поднесе оставка и да ги разреши сите кои тој ги поставил на границата со Косово, почнувајќи од Наим Рамука и дека  само така ќе има услови за независна истрага без притисоци. Бараат декласификација и објавување на снимките од граничниот премин Блаце за граѓаните  да видат која е вистината, кој е шериф на границата.

Брране Петрушевски од ВМРО-ДПМНЕ бара СДСМ да каже дали еден од приведените за убиството кај Мавровка го пуштиле да избега од затвор за да им работи за избори.

-Е.К. еден од приведените за убиството кај Мавровка избегал од Идризово на 15.04.2024 година, три недели пред парламентарните избори. СДС да каже дали го пуштиле од затвор сега веќе приведениот за убиство со цел партиски да го ангажираат? Дали СДС расфрлаше пердуви и правеше сценарија рамни на научна фантастика за бегството на Блерим Рамадани, кои исто тие го овозможија за да го сокрие ова? Срамота е на кое дереџе се симна СДС. Прикрива приведени за убиство и спасува судија измеќар на ДУИ како Пајазит Пајазити – рече Петрушевски.

Според ВМРО-ДПМНЕ, хаосот и безредието се плод на неспособноста и криминалот на СДСМ.