Нова форма на орален инсулин, која наскоро може да се тестира кај луѓе, може да се земе како алтернатива на шприцовите или инсулинските пумпи. Научниците развија начин за обезбедување на инсулин орално, преку капсула или чоколадо без шеќер и успешно го тестираа на животни. Овој нов инсулин ќе биде подготвен за тестирање на луѓе во 2025 година, пишува „Јуроњуз“.

Околу 61 милион луѓе имаат дијабетес во Европа, а меѓу 5 и 10 отсто од нив имаат дијабетес тип 1, што значи дека треба да земаат инсулин дневно за да го контролираат нивото на гликоза во крвта. Некои луѓе со почест тип 2 дијабетес, исто така, треба да земаат инсулин. Трите најчести начини за земање инсулин се со шприц, инсулинско пенкало или инсулинска пумпа, според Меѓународната федерација за дијабетес.

Истражувачите од Универзитетот во Сиднеј во соработка со Арктичкиот универзитет во Норвешка претходно открија дека е можно да се доставуваат лекови до црниот дроб со нано-носители.

„Бевме успешни во добивањето грант во Австралија, за да разгледаме различни методи за да ги доставиме тие терапевтски средства, до тие клетки во стареењето на населението. А тоа вклучуваше употреба на нанолекови. Така, почнавме да користиме квантни точки, кои всушност беа неверојатно кул и неверојатни материјали“, изјави д-р Николас Хант, виш предавач на Универзитетот во Сиднеј.

Квантните точки се ситни полупроводнички честички со димензии од редот на неколку нанометри.

„Овој начин на земање инсулин е попрецизен бидејќи инсулинот брзо го доставува до деловите од телото на кои им е најпотребен. Кога земате инсулин со шприц, тој се шири низ телото каде што може да предизвика несакани ефекти“, се вели во соопштението на Питер МекКурт од UiT – Арктичкиот универзитет во Норвешка.

Овој систем бил тестиран на глувци, стаорци и павијани и тимот ги објавил своите наоди во Nature Nanotechnology.

Павијаните не сакале да земаат таблета, па истражувачите пробале желе без шеќер и чоколадо без шеќер, а павијаните претпочитале чоколадо создадено во лабораторија.

„Кога ја правевме нашата студија за павијаните, го направивме тоа на начин на кој е дизајниран да го имитира она што би се направило во првата фаза на клиничкото испитување. Значи, тоа е истата доза на инсулин што би се користела, истата експериментална парадигма“, рекол Хант.

Во моментов, фокусот е на производството за претстојното клиничко испитување со надеж дека ќе започне до крајот на годината.

Хант вели дека се надеваат дека ќе спроведат последователни испитувања во 2026 година, кои доколку бидат успешни, би можеле да значат барање одобрение од регулаторите најрано во 2028 година.

„Ние се надеваме дека терапевтскиот лек што тие можат да го земаат орално и нешто со кое не можат да се предозираат… може да овозможи подобра контрола на гликозата во текот на целиот животен циклус“, рекол Хант, додавајќи дека инсулинот што се голта не треба да да се чува во фрижидер и сепак е исплатлив.